Misioni Artemis II ka hyrë në një fazë vendimtare, teksa ekuipazhi i tij është tashmë në rrugë drejt Hënës, duke ofruar një pamje të drejtpërdrejtë të jetës në hapësirë më larg se çdo mision me njerëz në më shumë se gjysmë shekulli.
Katër astronautët Reid Wiseman, Victor Glover dhe Christina Koch nga Shtetet e Bashkuara, si dhe Jeremy Hansen nga Agjencia Kanadeze e Hapësirës u nisën me anijen Orion nga Qendra Hapësinore Kennedy në Florida, duke shënuar një hap të madh drejt rikthimit të njerëzimit në Hënë.
Ekuipazhi pritet të kryejë një fluturim rreth Hënës dhe të rikthehet në Tokë në një mision 10-ditor. Gjatë komunikimeve nga hapësira, astronautët përshkruan përvojën unike të jetës në mikrogravitet dhe emocionet e nisjes historike.
“Nuk ka dallim mes lart dhe poshtë,” tha specialistja e misionit Christina Koch, duke shtuar se gjumi në kapsulë është i rehatshëm pavarësisht mungesës së orientimit tradicional. “Po mësojmë ta bëjmë këtë kapsulë një shtëpi.”
Nga ana tjetër, piloti Victor Glover tregoi momentet e nisjes si një përzierje mes profesionalizmit dhe entuziazmit: “Kur motorët u ndezën, ishte një udhëtim ku përpiqesh të ruash qetësinë, por fëmija brenda teje do të shpërthejë nga gëzimi.”
Ai vlerësoi gjithashtu punën e ekipeve të NASA, të cilat kanë përgatitur misionin për muaj të tërë.
Ndërkohë, komandanti Reid Wiseman konfirmoi se anija tashmë ka hyrë në trajektoren drejt Hënës: “Jemi 100% në rrugë drejt Hënës. Graviteti i saj do të na tërheqë në ditët në vijim.”
Misioni konsiderohet një arritje e jashtëzakonshme teknologjike dhe një moment historik, pasi është fluturimi i parë me ekuipazh që shkon kaq larg nga Toka që prej epokës së Apollos.
Artemis II vjen pas testit pa ekuipazh të Artemis I dhe përbën një hap kyç drejt misioneve të ardhshme, përfshirë Artemis III, që synon rikthimin e astronautëve në sipërfaqen e Hënës me mbështetjen e kompanive private hapësinore.
