Një operacion antidrogë që zbuloi dy laboratorë të kultivimit të kanabisit në fshatin Kurtaj të Peqinit, ka shkaktuar një “tërmet” të vërtetë në radhët e Policisë së Shtetit. Ngjarja, e cila implikon pronën e kreut të burgut të Rrogozhinës, ka çuar në pezullimin e menjëhershëm të 7 zyrtarëve të lartë dhe inspektorëve, përfshirë edhe vetë Shefin e Komisariatit të Peqinit.
Zbulimi i “shtëpisë së barit”
Gjithçka nisi më 19 mars, kur gjatë kontrollit të territorit u gjetën dy ambiente të mbyllura dhe të përshtatura me pajisje laboratorike (llamba dhe sistem ventilimi) për rritjen e bimëve narkotike. Ajo që e rëndoi situatën ishte fakti se këto ambiente ndodheshin në pronat e drejtuesit të burgut të Rrogozhinës, duke ngritur dyshime të forta për bashkëpunim ose neglizhencë totale nga ana e policisë zonale.
“Fshirja” e kupolës drejtuese
Me urdhër të Drejtorit të Përgjithshëm të Policisë, Drejtoria e Standardeve Profesionale ka marrë masën e pezullimit nga detyra për 7 punonjës policie, të cilët akuzohen për “moszbatim haptazi të ligjit” dhe dështim në parandalimin e krimit në zonën e tyre të përgjegjësisë.
Zyrtarët e pezulluar janë:
A. G. – Shef i Komisariatit të Policisë Peqin;
D. K. – Shef i Krimeve në Komisariatin Peqin;
S. D. – Specialist i Policisë Kriminale (Peqin);
M. Z. – Specialist i Policimit në Komunitet (inspektori i zonës);
B. L. – Ish-shef i Komisariatit Peqin (aktualisht në Devoll);
D. S. – Ish-shef Krimesh në Peqin (aktualisht në Devoll);
A. K. – Ish-agjent kriminal në Peqin.
Hetimet vijojnë
Përveç masave disiplinore, Prokuroria po vijon hetimet për të parë nëse këta zyrtarë kanë pasur përfitime direkte apo kanë favorizuar qëllimisht kultivuesit. Policia e Shtetit deklaroi se është e vendosur të ndëshkojë cilindo punonjës që bëhet palë me krimin, ndërsa vëmendja mbetet te procedimi i mëtejshëm i pronarit të objektit dhe personave përgjegjës për laboratorët e drogës.
