Paris Saint-Germain ka marrë një fitore të rëndësishme në ndeshjen e parë çerekfinale përballë Liverpool-it në Champions, duke triumfuar 2-0.
Sfida e luajtur në “Parc des Princes” nisi në mënyrën më të mirë pr kampionët në fuqi të Europës, të cilët kaluan në avantazh në minutën e 11’ me anë të Doue.
“Reds”-at u munduan të reagonin por më kot, me parizienët që morën nën kontroll sfidën.
Gjithsesi, goli i dytë dhe i qetësisë erdhi në minutën e 65’ nga Kvaratskhelia, me PSG që hedh kështu një hap të sigurt drejt gjysmëfinales dhe misionit për të mbrojtur titullin.
Nga ana tjetër, Liverpool-it do t’i duhet një nga mrekullitë e veta pas një jave në “Anfield”, në mënyrë për të vazhduar ëndrrën Champions.
Barcelona është mposhtur 0-2 nga Atletico e Madridit në çerekfinalen e parë të Ligës së Kampionëve.
Takimi i luajtur në “Camp Nou” nisi me emocione të forta, me të dyja skuadrat që kërcënuan portat e njëra-tjetrës.
Katalanasit u dukën sikur e morën lojën në dorë, por Cubarsi katranosi çdo gjë pas ndërhyrjes së gabuar në minutën e 44’, që e bëri të dilte me karton të kuq.
Vetëm një minutë më pas, Alvarez realizoi një supergol nga goditja e dënimit për të kaluar në avantazh të besuarit e Simeones.
Skuadra e Flick u mundua të reagonte në pjesën e dytë, duke krijuar disa raste me Rashford dhe Yamal, por pa pasur finalizimin e duhur.
Çdo gjë u bë më keq për blaugranat në minutën e 70’, kur Sorloth, i ndodhur në kohën dhe vendin e duhur, dërgoi topin në rrjetë duke dyfishuar shifrat.
Me këtë fitore, Atletico e Madrid hedh një hap të sigurt drejt gjysmëfinales, ndërsa Barcelona do të kërkojë përmbysjen e madhe pas një jave në “Metropolitano”.
