Organizata Botërore e Shëndetësisë ka tentuar të ulë shqetësimet globale pas rasteve të raportuara me hantavirus në bordin e anijes turistike MV Hondius, duke deklaruar se situata nuk përbën rrezik për një pandemi të ngjashme me Covid-19.
Sipas OBSH-së, hantaviruset transmetohen “shumë, shumë ndryshe” nga koronavirusi dhe zakonisht kërkojnë kontakt të zgjatur me burimin e infeksionit. Për këtë arsye, organizata vlerëson se rreziku për shëndetin publik mbetet i ulët.
Deri më tani janë konfirmuar pesë nga tetë rastet e dyshuara, ndërsa të gjithë personat e prekur kanë qenë në bordin e anijes. Autoritetet shëndetësore paralajmërojnë se mund të zbulohen edhe raste të tjera, pasi periudha e inkubacionit të sëmundjes mund të zgjasë deri në gjashtë javë.
OBSH-ja thekson se niveli i rrezikut mbetet i ulët edhe për Ishujt Kanarie, destinacioni drejt të cilit po lundron aktualisht anija.
Hetimet nga Argjentina
Ndërkohë, hetimet për shpërthimin janë ende në vazhdim. Sipas të dhënave paraprake, çifti që dyshohet se u infektua i pari kishte vizituar zona ku ishte e pranishme një specie miu e njohur si bartëse e hantavirusit. Autoritetet po vijojnë gjurmimin e kontakteve dhe analizimin e rrethanave të infektimit.
Autoritetet dhe ekspertët në Argjentinë po përpiqen të përcaktojnë nëse vendi i tyre është burimi i një shpërthimi vdekjeprurës të hantavirusit në një anije turistike që lundron në Atlantik, ndërsa raportohet se disa pasagjerë tashmë janë kthyer në vendet e tyre.
Argjentina, nga ku u nis udhëtimi drejt Antarktidës, renditet nga Organizata Botërore e Shëndetësisë si një nga vendet me incidencën më të lartë të kësaj sëmundjeje të rrallë të transmetuar nga brejtësit në Amerikën Latine. Hetuesit po punojnë për të gjurmuar burimin e infeksionit.
Ministria e Shëndetësisë së Argjentinës raportoi të martën 101 raste me hantavirus që nga qershori 2025, pothuajse dyfish krahasuar me vitin e kaluar.
Një lloj hantavirusi i quajtur virusi Andes, që gjendet në Amerikën e Jugut, mund të shkaktojë një sëmundje të rëndë dhe shpesh fatale në mushkëri, të quajtur sindroma pulmonare nga hantavirusi. Autoritetet argjentinase thonë se sëmundja ka shkaktuar vdekjen në rreth një të tretën e rasteve gjatë vitit të fundit.
Autoritetet njoftuan se pasagjerët në anijen MV Hondius kanë rezultuar pozitivë për virusin Andes.
Tre pasagjerë kanë vdekur, një ndodhet në kujdes intensiv në një spital në Afrikën e Jugut, dhe tre të tjerë janë evakuuar nga anija. Një tjetër pasagjer që ishte larguar më herët nga udhëtimi ka rezultuar pozitiv në Zvicër.
Argjentina po dërgon materiale gjenetike dhe pajisje testimi për të ndihmuar Spanjën, Senegal-in, Afrikën e Jugut, Holandën dhe Mbretërinë e Bashkuar në zbulimin e virusit.
Zakonisht, njerëzit infektohen nga hantavirusi përmes kontaktit me brejtës të infektuar ose me urinën, jashtëqitjet apo pështymën e tyre. Transmetimi nga njeriu te njeriu është i rrallë, por është vërejtur në disa shpërthime të mëparshme me variantin Andes.
Shqetësim ka edhe për 23 pasagjerë që thuhet se zbritën nga anija në ishullin Saint Helena më 23 prill dhe më pas u kthyen në vendet e tyre, përfshirë SHBA-të. Disa prej tyre po monitorohen në shtete si Georgia, Kalifornia dhe Arizona, pa shfaqur simptoma deri tani.
Vdekja e parë në anije ishte një burrë holandez 70-vjeçar më 11 prill. Gruaja e tij 69-vjeçare vdiq më vonë në Afrikën e Jugut. Një pasagjere gjermane vdiq më 2 maj.
Autoritetet argjentinase po përpiqen të gjurmojnë itinerarin e pasagjerëve përpara se të hipnin në anije në qytetin Ushuaia, në jug të Argjentinës. Inkubacioni i virusit zgjat nga 1 deri në 8 javë, duke e bërë të vështirë përcaktimin e vendit të saktë të infektimit.
Drejtori i përgjithshëm i OBSH-së, Tedros Adhanom Ghebreyesus, tha se organizata po bashkëpunon me operatorët e anijes dhe autoritetet shëndetësore për të monitoruar situatën dhe për të ndihmuar në evakuime kur është e nevojshme. Ai shtoi se rreziku i përgjithshëm për shëndetin publik mbetet i ulët.
Tre pasagjerë u evakuuan nga anija me rreth 150 persona në bord, duke lejuar që ajo të vazhdojë udhëtimin drejt Ishujve Kanarie, megjithëse ka pasur kundërshtime nga autoritetet lokale.
Ekspertët në Argjentinë paralajmërojnë gjithashtu se ndryshimet klimatike mund të rrisin përhapjen e hantavirusit, pasi rritja e temperaturave ndikon në zgjerimin e habitatit të brejtësve që e transmetojnë virusin.
