Botërori 2026 nuk do të jetë vetëm një festë futbolli, por edhe një minierë ari. Përmes të drejtave televizive, sponsorëve, shitjes së biletave, turizmit dhe investimeve publike, Kupa e Botës që do të organizohet nga Shtetet e Bashkuara, Kanadaja dhe Meksika pritet të gjenerojë një aktivitet ekonomik që kalon 80 miliardë dollarë.
Turneu do të nisë më 11 qershor dhe konsiderohet Botërori më i madh në histori. Sipas vlerësimeve, do të ndihmojë për krijimin e 824 mijë vendeve të punës me kohë të plotë në tre vendet organizatore, duke përfshirë sektorë si siguria, teknologjia, shërbimet shëndetësore, logjistika dhe mikpritja.
Ndikimi ekonomik nuk do të jetë i njëjtë për të gjitha zonat, ku pjesën e luanit do ta kenë qytete si New York, Dallas, Atlanta, Los Angeles dhe Miami.
Kupa e Botës po shndërrohet gjithnjë e më shumë në një platformë ekonomike globale, ku futbolli mbetet në qendër të vëmendjes, por miliardat lëvizin më shumë përtej vijave të fushës së lojës.
