Një incident i rëndë me armë zjarri ka regjistruar një viktimë ditën e sotme në qytetin Biddeford të rajonit New England, ku janë përfshirë agjentë të Shërbimit Amerikan të Emigracionit dhe Doganave (ICE). Lajmi është konfirmuar zyrtarisht nga kryetari i Dhomës së Përfaqësuesve të rajonit, Ryan Fecteau, i cili bëri të ditur se autoritetet shtetërore kanë nisur menjëherë punën për të sqaruar rrethanat e plota të kësaj ngjarjeje.
Përmes një deklarate të publikuar në rrjetin social Facebook, Fecteau dha detajet e para mbi koordinimin e forcave të sigurisë në terren, duke paralajmëruar edhe përfshirjen e strukturave federale:
“Një person u vra. ICE ishte e përfshirë. Policia e Shtetit dhe Departamenti i Sigurisë Publike ndodhen në vendngjarje për të mbledhur informacione, ndërsa pritet që hetimeve t’u bashkohet edhe FBI-ja”, shkroi zyrtari i lartë, duke shtuar se do të ofrojë përditësime sapo të bëhen publike të dhëna të reja.
Sipas raportimeve të rrjetit mediatik CNN, ky nuk është një rast i izoluar. Ngjarja vjen vetëm pak ditë pas një tjetër incidenti fatal në Houston, ku një oficer federal i imigracionit qëlloi për vdekje një emigrant meksikan gjatë një kontrolli rrugor — ngjarje kjo që shkaktoi valë protestash dhe kërkesa të forta për transparencë e llogaridhënie ndaj agjencive federale.
Deri në këto momente, siç bën të ditur CNN, Shërbimi Amerikan i Emigracionit dhe Doganave (ICE) dhe Departamenti i Sigurisë Kombëtare të SHBA-së nuk i janë përgjigjur kërkesave zyrtare për të dhënë një reagim apo sqarim mbi operacionin që çoi në vrasjen e personit në Biddeford.
