Apple ka prezantuar një program të ri leasing-u që u mundëson konsumatorëve të marrin me qira iPhone, Mac dhe pajisje të tjera të kompanisë, duke i paguar me këste mujore. Nisma vjen në një kohë kur çmimet e pajisjeve elektronike po rriten dhe përdoruesit po i mbajnë telefonat e tyre për më gjatë.
Programi do të jetë i disponueshëm në Shtetet e Bashkuara duke nisur nga dita e martë, në bashkëpunim me platformën e pagesave Klarna. Ai do të ofrohet në dyqanet fizike të Apple, në faqen zyrtare dhe në aplikacionin Apple Store.
Sipas skemës së re, modelet e iPhone dhe Apple Watch mund të merren me kontrata 12 ose 24-mujore, ndërsa Mac dhe iPad do të jenë të disponueshme me kontrata 24 ose 36-mujore.
Në program përfshihen modelet më të reja, si iPhone 17, iPhone Air, Apple Watch Series 11, Apple Watch Ultra 3, MacBook Air, MacBook Pro, iMac, Mac Studio, iPad Air, iPad Pro dhe iPad Mini. Ndërkohë, pajisjet më të lira të kompanisë, si iPhone 16, MacBook Neo, iPad bazë dhe Apple Watch SE, nuk janë pjesë e kësaj oferte.
Apple thekson se programi i ri zëvendëson iPhone Upgrade Program, duke zgjeruar mundësinë e pagesës me këste edhe për produkte të tjera dhe duke ofruar fleksibilitet më të madh për klientët.
Opsioni më ekonomik për marrjen me leasing të një iPhone kushton 17.99 dollarë në muaj, ndërsa programi i mëparshëm i përmirësimit të iPhone niste nga rreth 42 dollarë në muaj.
Ekspertët e tregut vlerësojnë se kjo lëvizje synon ta bëjë blerjen e pajisjeve Apple të ngjashme me një abonim mujor, në një periudhë kur konsumatorët po shtyjnë zëvendësimin e telefonave për shkak të çmimeve gjithnjë e më të larta.
Programi prezantohet vetëm pak javë përpara lançimit të gjeneratës së re të iPhone-ve, ku Apple pritet të prezantojë edhe telefonin e saj të parë me ekran të palosshëm, që sipas raportimeve mund të jetë pajisja më e shtrenjtë e kompanisë deri më sot.
