Pas afro dy javësh në Shqipëri, Richard Grenell, një nga njerëzit më të besuar të presidentit amerikan Donald Trump, ka përmbyllur pushimet e tij në jugun e vendit, duke shijuar perëndimin e diellit nga Marina Bay në Vlorë.
“Vlora, Shqipëria është magjike dhe nuk mund të them mjaftueshëm për shtëpinë time larg shtëpisë – Marina Bay në Vlorë. (Duhet të theksoj se askush nuk më paguan për ta thënë këtë – por Marina Bay është një perlë.) Është i përballueshëm, por luksoz. Mund të jetë relaksues ose një skenë natën vonë (ka një kazino!)… çfarëdo që të dëshironi. I bëra të gjitha këto foto dhe video vetë, krejtësisht të paplanifikuara dhe pa skenar. Besmir – do të më mungosh ti dhe ekipi yt. Por me siguri do të të shoh përsëri së shpejti” shkroi Richard Grenell në postimin e ndarë pasditen e sotme në faqen e tij të Instagramit.
Njëjtë si një vit më parë, edhe këtë verë emri i Richard Grenell u lidh sërish me rivierën shqiptare. Një prej njerëzve më të besuar të presidentit amerikan Donald Trump duket se e ka kthyer tashmë në traditë kalimin e pushimeve verore në brigjet mahnitëse të jugut të Shqipërisë.
