Për vite me radhë, nxënësit e një fshati të izoluar në provincën Yunnan të Kinës përballeshin çdo ditë me një udhëtim të gjatë dhe të vështirë për të shkuar në shkollë.
Sot, falë dy ashensorëve të ndërtuar në faqet e malit, e njëjta rrugë përshkohet në rreth 30 minuta.
Fshati Nizhouhe ndodhet në një zonë të thellë malore, në fund të një gryke të rrethuar nga shpate të pjerrëta. Për të shkuar në shkollën fillore në fshatin fqinj, fëmijëve u duhej të përshkonin shtigje malore dhe të ngjiteshin për më shumë se tre orë.
Udhëtimi vajtje-ardhje mund të zgjaste rreth gjashtë orë dhe terreni e bënte rrugën të vështirë dhe të rrezikshme.
Ndryshimi nisi në vitin 2022, me përurimin e ashensorit të shkallëve Qingyun.
I ndërtuar në faqen thuajse vertikale të malit, ashensori ka një lartësi prej 268 metrash dhe u mundësoi nxënësve të kapërcenin në pak minuta pjesën më të vështirë të rrugës.
Por struktura nuk shërbeu vetëm si mjet transporti për banorët.
Pamja e pazakontë e ashensorit dhe udhëtimi në faqen e malit tërhoqën turistë, duke e kthyer zonën në një atraksion. Rritja e vizitorëve solli edhe radhë të gjata, pasi nxënësit, edhe pse e përdornin ashensorin pa pagesë, duhej të prisnin bashkë me turistët.
Për të përballuar fluksin, pranë ashensorit të parë u ndërtua një tjetër strukturë panoramike, e njohur si Shkalla Fuyao.
Me një lartësi prej rreth 288 metrash, ashensori i ri është më i gjerë dhe më i shpejtë, duke rritur kapacitetin e transportit në zonën malore.
Sot, rruga e nxënësve për në shkollë përfshin një autobus lokal, më pas ashensorin e jashtëm dhe në fund një teleferik. I gjithë udhëtimi, që më parë mund të zgjaste rreth gjashtë orë vajtje-ardhje, tani përfundon në afërsisht 30 minuta.
Për fëmijët e Nizhouhe-s, ngjitja e gjatë nëpër shtigjet malore tashmë është pjesë e së kaluarës. Një rrugë që dikur kërkonte orë të tëra, sot përshkohet me autobus, ashensor dhe teleferik.
