Një ekip studiuesish me bazë në Kanada ka gjetur indikacione se ngrënia e ushqimeve të caktuara që shpesh cilësohen si të pashëndetshme, mund të çojë në përgjigje më të mira ndaj trajtimit të kancerit.
Të botuara në revistën shkencore Nature, gjetjet e Universitetit McGill sugjerojnë se disa vakte që konsiderohen shëndoshëse mund të ndikojnë në mikrobiomën e zorrëve, në mënyra që përmirësojnë përgjigjet ndaj imunoterapisë.
“Gjetjet tona ishin të habitshme sepse ato nxorën në pah një përfitim të disa dietave obezogjene (ato që nxisin shtimin e tepërt në peshë)”, tha Daniela Quail, profesoreshë e asociuar në Departamentin e Fiziologjisë në McGill.
Por, në vend që pacientët të hanë ushqime të yndyrshme, shkencëtarët shpresojnë të përcaktojnë me saktësi përbërësit e dobishëm të prodhuar nga mikrobioma e zorrëve, në mënyrë që të mund të përsërisin përfitimet në mënyrë të sigurt në terapitë e ardhshme.
McGill theksoi se, ndërsa obeziteti në përgjithësi shoqërohet me incidencë dhe vdekshmëri më të lartë të kancerit, ka indikacione se pacientët me kancer që kanë një indeks të lartë të masës trupore (BMI), “shpesh i përgjigjen më mirë frenuesve të pikave të kontrollit imunitar”.
“Marrëdhënia midis dietës dhe trajtimit të kancerit është më komplekse, sesa një mesazh i thjeshtë për të ngrënë shëndetshëm dhe për të bërë ushtrime fizike”, shpjegoi Quail, e cila është gjithashtu hetuese kryesor në Institutin e Kancerit Rosalind & Morris Goodman.
“Ka një interes të ripërtërirë në përshtatjen e dietës për të zvogëluar rrezikun e kancerit dhe për të përmirësuar rezultatet e trajtimit, si pjesë e mjekësisë së personalizuar”, tha ekipi në punimin e tyre.
Quail dhe kolegët e saj paralajmëruan se paradoksi i dukshëm i obezitetit, nuk do të thotë që njerëzit duhet të supozojnë se një dietë me shumë yndyrë është e shëndetshme. Ata kërkuan kërkime të mëtejshme për të hetuar se si bashkëveprojnë yndyrnat, zorrët dhe sëmundjet dhe si mund të përmirësohen trajtimet.
Në vitin 2025, një ekip studiuesish të Universitetit Lund publikoi gjetje që sugjeronin se djathi me shumë yndyrë mund të zvogëlonte gjasat e demencës. Më herët këtë vit, shkencëtarët e Universitetit të Reading vunë në dukje ndryshimin midis yndyrnave trans që gjenden natyrshëm në produktet e qumështit dhe varianteve shumë më pak të shëndetshme të përpunuara. Hulumtime të tjera kanë zbuluar se alternativat me bazë bimore, kanë vështirësi t’i afrohen vlerës ushqyese të produkteve të plota të qumështit./ DPA News.
