Një ngjarje e rëndë ka ndodhur në Itali, ku trupi i pajetë i një shqiptari është gjetur brenda një pusi.
Raportohet se viktima është 31-vjeçari Denaldo Maxhallaku, i cili u gjet brenda një pusi rreth 10 metra të thellë, në zonën e Longianos, në provincën e Forli-Cesenës. Sipas mediave italiane, autoritetet kanë nisur hetimet për vrasje, pasi dyshohet se i riu mund të jetë vrarë me armë zjarri, ndërsa kishte disa ditë që ndodhej brenda pusit.
Pranë pusit ku u gjet trupi raportohet se janë zbuluar edhe disa gëzhoja pistolete, teksa makina e shqiptarit u gjet e djegur pak kilometra larg.
Denaldo Maxhallaku ishte shpallur i zhdukur pasi kishte humbur kontaktet me familjen e tij në Itali. Kontakti i fundit me 31-vjeçarin, sipas informacioneve të publikuara më herët nga mediat, ishte regjistruar më 7 tetor 2026, rreth orës 20:30, në zonën e Savignano sul Rubicone.
Një ditë më pas, më 8 tetor, automjeti i tij, një “Fiat Punto” e zezë, u gjet i djegur plotësisht në zonën e Roncofreddos, pranë lumit Rubicone, disa kilometra larg vendit ku u zbulua trupi.
Pas gjetjes së automjetit, autoritetet italiane kishin intensifikuar kërkimet në zonën mes Roncofreddos dhe Soglianos, përgjatë rrugës provinciale 85, e njohur si Fondovalle Rubicone.
