Videoloja shumë e pritur Grand Theft Auto VI (GTA VI) ka shënuar një sukses rekord që në ditën e parë të lançimit, duke gjeneruar 3.79 miliardë dollarë shitje me pakicë në mbarë botën. Rockstar Games e cilësoi atë si lançimin më të madh në historinë e industrisë së argëtimit.
Sipas kompanisë, loja regjistroi gjithashtu 32.5 milionë kopje të shitura përmes porosive paraprake, duke vendosur një rekord të ri në platformat e lojërave.
Të ardhurat e GTA VI janë pothuajse pesë herë më të larta se ato të paraardhëses së saj, GTA V, e cila gjeneroi rreth 800 milionë dollarë gjatë 24 orëve të para pas publikimit në vitin 2013. Shifra tejkalon gjithashtu të ardhurat globale të filmit Avengers: Endgame, prej rreth 2.9 miliardë dollarësh.
Loja u lançua për PlayStation 5 dhe Xbox Series X|S, duke tërhequr vëmendje të jashtëzakonshme në mbarë botën. Sipas platformës Visibrain, diskutimet rreth saj në rrjetet sociale tejkaluan edhe ato për Kupën e Botës në futboll të këtij viti.
Kritikët e kanë pritur me vlerësime shumë pozitive, ndërsa në Metacritic loja ka marrë 99 pikë. Rockstar e ka cilësuar këtë rezultat si një nga arritjet më të mëdha në historinë e videolojërave.
Megjithatë, suksesi i lojës është shoqëruar edhe me paralajmërime nga autoritetet policore në SHBA. Disa departamente policie u kanë bërë thirrje qytetarëve që të mos imitojnë në jetën reale veprimet kriminale të paraqitura në lojë, si vjedhjet e automjeteve, drejtimi i rrezikshëm dhe dhuna.
Një nga mesazhet më të drejtpërdrejta erdhi nga Policia e Atlantës: “GTA nuk është një vend i vërtetë, por Atlanta është\!”, duke u kujtuar lojtarëve se argëtimi virtual nuk duhet të ngatërrohet me jetën reale.









