Komisioni Evropian po organizon sot, 18 nëntor, Forumin e Zgjerimit të BE, ngjarjen e parë të këtij lloji, kushtuar prioritetit të tij 2024–2029. Kryeministri Edi Rama i cili ndodhet në Bruksel në vijim të agjendës për çeljen e grup-kapitullit të fundit të negociatave, vuri theksin pikërisht te zgjerimi dhe avancimi i Shqipërisë në përmbushjen e detyrave.

“Duhet të rrëfej që duke ardhur këtu sot, e kapa veten duke menduar se çfarë mund të them tjetër për zgjerimin, kam folur aq shpesh për të, sa kam frikë se mund të botoj edhe një libër. Zgjerimi dhe e ardhmja janë të pandashme”, u shpreh ai në nisje të fjalës së tij.

Megjithatë tha se në vend të zgjerimit, preferon fjalën “ribashkim”.

“Ajo që nuk na vrau, na bëri më të fortë. Ne i bëjmë këto për veten tonë, brezin tonë dhe të ardhmen e Shqipërisë. Ne vazhdojmë punën a thua se negociatat janë hapur prej kohësh. Qëndrojmë drejt, me kokën lart pasi për vetëm 14 muaj kemi hapur të gjithë kapitujt dhe e kemi vendosur veten në krye të bllokut të Ballkanit Perëndimor”, tha kreu i qeverisë shqiptare.

“Në barometrin e fundit europian, Shqipëria ishte në krye të listës me 92% të qytetarëvre të saj besnikë të BE-së”, theksoi kryeministri.

Reshtoi pesë të mira që sipas tij sjell procesi i zgjerimit, si më poshtë:

Ribashkimi shëron plagët historike, rikthen lidhjet e kombeve të ndara me forcë, rikthen identitetin europian të atyre që u mbajtën jashtë me dhunë e jo me zgjedhje.

Zgjeron jo vetëm gjeografinë e BE-së, por të stabilitetit e demokracisë.

Përmbush një premtim të vjetër për ata që luftuan për liri e për të cilët Europa ishte një fener i vërtetë. Por ky premtim i vjetër duhet mbajtur plotësisht.

Sjell prosperitet, zgjerimi është edhe ekonomik. Zgjerohet tregu, ka dinamizëm e energji rinore.

Zgjerimi funksionon, sa herë BE ka futur anëtarë të rinj në familje përfitimet kanë tejkaluar frikën, faktet e ilustrojnë këtë dhe s’ka asnjë arsye pse të ndodhë e kundërta.

Tha se nëse e kundërta e zgjerimit ndodh, kontinenti do ketë ndjenjën e pafuqisë, një Europë që tradhton idenë e themelimit të vet dhe që nuk është e përshtatshme të mbijetojë si lojtar i madh në këtë lojë të re.

Fjalën e tij e mbylli duke iu drejtuar Komisioneres Marta Kos.

“Teksa shkruan historinë me ne, duhet të sigurohet që historia të shkruajë për të në faqet e saj. Antologjia e plotë e një zgjerimi të bërë nga unë, duhet të jetë libri që ajo duhet të botojë. Faleminderit për durimin!”, përfundoi në shenjë mirënjohjeje, numri një i kabinetit.

Forumi i Zgjerimit është pika e takimit për të gjithë profesionistët që punojnë mbi një nga prioritetet kryesore të mandatit 2024–2029 të Komisionit Europian, të cilët janë të angazhuar në mënyrë aktive në agjendën më ambicioze të zgjerimit të më shumë se një dekade.

Kujtojmë se të hënën, 17 nëntor, Shqipëria çeli të gjashtë grup-kapitujt në negociatat me BE-në, një fazë që pasohet me plotësimin e pikave të ndërmjetme e deri te objektivi kryesor, anëtarësimi i plotë i vendit në vitin 2027.

Ky moment historik u festua me verë e tortë në kryeqytetin belg, ku Rama mbajti një konferencë të përbashkët për shtyp me Komisioneren për Zgjerimin e BE-së, Marta Kos, dhe Ministren daneze për Çështjet Evropiane, Marie Bjerre.

Kreu i qeverisë ishte edhe në Hagë, ku takoi homologun e tij, Dick Schoof

Ish-deputeti i Partisë Demokratike, Dashnor Sula ka komentuar protestën e mbajtur një ditë më parë përballë Kryeministrisë. Ai u shpreh në një intervistë në “Top News” se protesta e djeshme pasqyroi qartë mosbesimin e thellë që ekziston edhe brenda vetë radhëve të Partisë Demokratike, duke theksuar se nëse nuk besojnë deputetët, atëhere nuk ka se çfarë të pritet nga qytetarët.

“Po ça të presësh kur nuk besojnë deputetët që janë rrethi më i ngushtë çfarë pret nga qytetarët? Nuk ke çfarë te thuash, ajo ishte protestë. Unë ndjej keqardhje ku është katandisur PD dhe nuk e kam thënë e kam thënë ka kohë, me vite. E di pse u bënë vite? Nëse do të hapni arkivat më 9 shtator unë kam dalë i parë dhe kam kërkuar sakrificën që duhet të bëjë Berisha dhe familja e tij për të shpëtuar partinë demokratike.

Momenti që Berisha të vazhdojë do i fusin në konflikt vëllavrasër në PD dhe kështu rezultoi. Në 8 janar një pjesë blindoi zyrat, me gjithçka, me hekra dhe pjesa tjetër sulmonte vëlla me vëlla. Janë pasoja. Tani duhet të kuptojmë një gjë kjo është çmenduri kolektive që ka kapur PD është e tmerrshme. PD është si një biznes që po falimenton dhe kjo është e tmerrshme. PS po lulëzon, pavarësisht problematikave. QË të luftosh duhet të bësh një stërvite, kurse këta nuk stërviten, këta shohin si luftojnë njëri-tjetrin.

Kush është kundër meje e kush flet më bukur, kush është servil, e kush do më zere vendin. Foltorja numër 1 që bëri Berisha ngjalli shpresë, por u deformua totalisht. Aty ka njerëz që nuk i votojnë as njerëzit e vet. Pse nuk fitojnë në Kavajë m ? Pse nuk ka banda në Kavajë, por janë njerëzit aty. Fitoi në Fushë-Krujë, aty janë bandat më të mëdha. Edhe Berisha nuk duhet të largohet, duhet të jetë Ervin Salianji, Tabaku, Aliahmeti figura që nuk kanë njolla.”, tha Sula.

Kryetari i Partisë Demokratike, Sali Berisha do të paraqitet nesër në SPAK për t’u pyetur për dosjen e 21 janarit.

Gjatë një konference për shtyp ai konfirmoi praninë e tij përballë prokurorëve që po hetojnë këtë çështje, ndonëse tha se hetimi është politik.

Berisha tha se “21 janari” klasifikohet si “vrasje shtetërore pa dashje”, ku efektivët e Gardës së Republikës kanë vepruar sipas ligjit të miratuar nga vetë socialistët.

“Roja i Gardës vepron mbi bazën e ligjit. Ligji thotë “po të gjuajti, breshëri në ajër, po vahdoi të të gjuajë, te këmbët, pastaj neutralizim”. Ky është ligji i bërë nga socialistët. Në qoftë se fillimisht u tha se janë plumba nga afër, çka linte për të nënkuptuar që ishin demonstrues që kishin gjuajtur njeri tjetrin, më vonë u tha se ajo ekspertizë nuk ishte e drejtë, por janë nga distanca. Atëherë, ato janë plumba të armëve të shtetit, të përdorura në përputhje me rregullat dhe ligjin, pra janë vrasje shtetërore jo me qëllim, pa dashje. Ky është vlerësimi im. Edhe këto quhen vrasje shtetërore. Të njëjtën gjë kam thënë edhe për Gërdecin se mbikqyrjen e kishte shteti”, tha Berisha.

Ai shtoi më tej se “nesër do jem në SPAK. Ndonëse e deklaroj që sot që ky është një hetim politik. Kjo çështje është hetuar me ekspertë shqiptarë dhe ndërkombëtarë, por mua nuk më kanë pyetur një herë. E dini pse? Se isha njeriu i rrethuar. Tani që më thërrasin, do shkoj. Kam qenë 5-6 orë në rrethim, në përpjekje për të pushtuar kryeministrinë”.