Votim i detyrueshëm i jep fund blerjes së të drejtës së votës.  Këtë propozon Sali Berisha pas humbjes në zgjedhjet e 14 majit. Gjatë një bashkëbisedimi me qytetarët në Facebook, ai tha se këtë ligj e ka edhe Greqia dhe Australia.

“Votim i detyrueshëm që e bën të pavlefshëm blerjen e të drejtës së votës. Blerjet janë dy llojesh sot.

Njëra është blerja e të drejtës votës; dmth; merr këto para mos dil në votim dhe ai nuk del se ka shitur të drejtën e votës dhe tjetra; merr këto para dhe dil voto për mua.

Nëse vihet votim me detyrim siç e ka Greqia e Australia, dhe miqtë e mi në Australi më kanë thënë se një nga arsyet që vendosëm këtë ligj ishte për t’i dhënë fund blerjes së të drejtës së votës”, tha ai.

Duke sjellë në vëmendje zgjedhjet e vitit 2011 dhe fenomenin e “Dushkut” ai akuzoi Tom Doshin se ka marrë mbi 200 mijë vota pa mbajtur asnjë fjalim dhe pa asnjë program.

“Kemi një fakt në këto zgjedhje Dushkun-Doshi, i cili ka marrë mbi 200 mijë vota pa mbajtur një fjalim, pa bërë një takim, pa paraqitur një program përveç aleancës me Edi Ramën dhe Lulzim Bravën. Nëse nuk qëndrojmë ndaj këtij krimi monstruoz shanset e këtij vendi për zgjedhje janë inekzistente.

PD ka nevojë të hapet, por nëse Pd e opozita nuk përballen për të garantuar votën e lirë, të garantojë që zgjedhjet e tjera nuk do të mbetet element, asnjë lloj shansi për të patur ndonjë mandat opozita në parlamentin që vjen”, tha Berisha.

Përveç Edi Ramës, tashmë duket qartë se Ilir Metaj është “fituesi” tjetër i zgjedhjeve lokale të 14 majit. Ai ka marrë shumicën e këshilltarëve që dolën nga “Bashkë Fitojmë”, duke mjelë në maksimum votën e demokratëve që ndoqën Sali Berishën në këtë harakiri, pas të cilit doli gjallë dhe më “i fryrë” vetëm Meta me partinë e tij PL, e cila ishte në prag falimentimi.

Ndërkohë që Sali Berisha në panik për të shtrënguar radhët e Rithemelimit, i cili po firon me shpejtësi pas zhgënjimit të madh, po lufton kundër “vjedhjes së votës nga regjimi Rama”, Ilir Metaj, së bashku me Monikën i është rikthyer hobisë së tij kur ishte president, piknikëve nëpër male.

Dhe është në të drejtën e tij që njësoj si Rama të ndihet i relaksuar, pas katastrofës që demokratët pësuan në 14 maj. Me ndihmën e ndërgjegjshme të Sali Berishës, i cili refuzoi lutjen e PD për ti futur në zgjedhje kandidatët demokratë në logon e partisë së tyre të vërtetë, Ilir Metaj ashtu si bën thithlopa, piu qumështin e demokratëve dhe tani i fryrë si “Lopë” ndihet i relaksuar dhe gati për pazarin e radhës.

Partia e tij me ndihmën e Berishës duke përdorur të njëjtën skemë, shpreson që të ringrihet në zgjedhjet e përgjithshme të vitit 2025, për të bërë atë që bëri në vitin 2013; pazarin e madh me Edi Ramën në kurriz të demokratëve. Berishën dihet që e ka “në xhep” për këtë plan, pasi ai ja di hallet më mirë se kushdo. Nëse nuk kanë harruar, të paktën demokratët, e shantazhoi në 2015 në parlament me video korrupsioni për djalin Shkëlzenin.

Por pavarësisht se Metaj e ka në xhep Berishën për zgjedhjet e vitit 2025, ata demokratë që u mashtruan nga “lexhenda që gjithmonë fiton”, pas datës 15 maj, nuk janë më të njëjtët që ishin në 14 maj.

Ish-kryetari i Partisë Demokratike, Lulzim Basha ka përkujtuar sot përmes një mesazhi në rrjetet sociale, përvjetorin e Revoltës së Spaçit.

Basha shkroi se Kryengritja e Spaçit shënon një nga lëvizjet më të forta antikomuniste gjatë regjimit famëkeq në Shqipëri. “Heronjtë e kësaj revolte do të mbeten përherë simbol i përpjekjes së shqiptarëve për t’u ndarë nga komunizmi”– shprehet Basha.

“Kryengritja e Spaçit shënon një nga lëvizjet më të forta antikomuniste gjatë regjimit famëkeq në Shqipëri. Heronjtë e kësaj revolte do të mbeten përherë simbol i përpjekjes së shqiptarëve për t’u ndarë nga komunizmi. Burrat që u ngritën kundër regjimit gjakatar në një nga burgjet më famëkeqe komuniste, dëshmuan vendosmërinë për t’iu kundërvënë propagandës dhe mizorisë famëkeqe. Ata qëndruan, luftuan dhe nuk u dorëzuan, duke vënë interesat më të larta të vendit mbi fatin e tyre personal. Mirënjohje përjetë heronjve që u sakrifikuan në emër të lirisë“!

Revolta e burgut të Spaçit, ishte një kryengritje dy ditore e të burgosurve politikë të burgut të Spaçit, e cila nisi më 21 maj 1973 dhe zgjati deri më 23 maj.

Revolta e Spaçit përbën një pikë kulmore në historinë e qëndresës antikomuniste, por edhe të lëvizjes për liri e demokraci. Shkaqet e kësaj revolte ishin kushtet çnjerëzore në të cilat vuanin të burgosurit e burgut, puna e tyre skllavëruese, përdorimi i torturave psikologjike dhe fizike, si edhe gjendja e mjeruar e popullit nën diktaturën komuniste, kundër së cilës ata u ngritën dhe qëndruan heroikisht.

Këtë të premte në “Intervistë” me Merita Haklajn ishte Astrit Patozi nga “Bindja Demokratike” për të analizuar atë që ndodhi me opozitën, rezultatin zgjedhor të 14 majit por edhe fitoren e radhës të mazhorancës socialiste.

Teksa deklaroi se humbja e opozitës ishte dërrmuese dhe kapilare, Patozi theksoi se në anën tjetër pushteti që ka aktualisht kryeministri Edi Rama është i frikshëm.

Nisur nga kjo situatë, ai vlerëson se e vetmja mënyrë për t’iu kundërvënë në mënyrë efektive është duke i dalë përpara me një kundër-model.
“Me model të ngjashëm, Rama e ka treguar se ai në fushën e tij është i pathyeshëm. Pra, duhet mundur me kundër-model. Me një opozitë frymëzuese, prurale, që respekton secili tjetrin.”

Për zotin Patozi është shumë e rëndësishme që opozita të sjellë një ofertë me fytyra dhe projekte të reja nëse do që të rrëzojë Ramën nga “froni”.
Po ashtu, duke marrë si shembull rezultatin e PSD-së të Tom Doshit, Patozi theksoi se rezultati i dobët i PD-së së Berishës nuk lidhet me faktin që ai është shpallur “non grata” nga SHBA.

Me nota humori, zoti Patozi kujtoi se në listën e zezë të SHBA-së është edhe Doshi, por efekti tek ai në zgjedhje ishte i kundërt.
“Nëse demokratët i kanë ikur non gratës, socialistët kanë shkuar ta votojnë non gratën. Disa socialistë kanë shkuar dhe janë bërë të Tom Doshit. Këtu kuptohet që roli i non gratës në Shqipëri nuk ka atë peshë që i është dhënë, ka më pak.”

Kreu i “Rithemelimit” e ka akuzuar Doshin se votat i ka të blera, por për Patozin rëndësi nuk kanë akuzat mes palëve, por fakti që opozita është e përçarë.
“Të rëndësishme janë gjëra të tjera: një parti që rrihet me njëri-tjetrin. Nuk bëhet asnjë lloj analize, reflektimi për atë që i ndodh.”

Edhe në kampin rozë, sipas Patozit, votat janë mbajtur me fenomenin e blerjes dhe presioneve të ushtruara ndaj administratës.