Fisnik Qosja, i cili ka shpallur fitoren në Kavaja ka deklaruar se me rivalin e PS, Redjan Krali shtrënguan duart si dy qytetarë.

Ai tha se edhe fushata e tyre u bë në mënyrë qytetare, ndërsa e ftoi Kralin që të bashkëpunojmë në të ardhmen për të mirën e Kavajës.

Qosja u shpreh se ndihet krenar që u votua nga qytetarët, të cilët vendosën ndryshimin.

“Akoma nuk ka mbaruar numërimi i votave, besoj është në fund. Bashkë me Redjanin bëra një shtrëngim duarsh qytetarie. Unë e falënderoj atë për gjestin qytetar që bëri dhe e ftoj të bashkëpunojmë edhe në të ardhmen bashkë.

Kavaja vendosi ndryshimin, Kavaja është qytet rebel që nuk i duron padrejtësinë.  Unë ndihem krenar, kavajasit vetojnë me zemër”, tha Qosja per News24.

Ndonëse kryeson bindshëm zgjedhjet në Tiranë, me mbi 42 mijë vota më shumë se rivali i tij, Erion Veliaj ka arritur një fitore të thellë përballë Belind Këlliçit edhe në Kombinat.

Edhe pse gjatë fushatës, kandidati i Berishës dhe i Metës e konsideronte Kombinatin si bastionin e tij dhe pretendonte se ajo ishte zona e tij me e sigurt, Veliaj ka arritur në këtë zonë të sigurojë 61 për qind të votave.

Veliaj po shënon një fitore spektakolare në kryeqytet, ku deri në këto momente është mbi 42 mijë vota përpara rivalit të tij Belind Këlliçi.

Gjatë tetë viteve të fundit, Bashkia e Tiranës ka realizuar një sërë investimesh të rëndësishme në këtë zonë, si në infrastrukturë, ashtu dhe në lagjen e re që po merr jetë ku do të sistemohen të prekurit nga tërmeti.