Këtë të martë të 30 shtatorit, do të luhen nëntë ndeshje, të vlefshme për raundin e dytë në Champions League.
Në letër, pretendentët kanë përballje të lehta, por fjalën e fundit do e thotë fusha.
Bayern Munich luan në transfertë ndaj qipriotëve të Pafos. Gjermanët nuk pritet të kenë vështirësi, ndërsa synojnë suksesin e dytë pas atij ndaj Chelsea.
Nuk pritet ta ketë të vështirë as Interi, që luan në shtëpi ndaj Slavia Pragës. Zikaltërit vijnë në këtë takim, pas 3 pikëve të para në raundin e parë ndaj Ajax.
Transfertë delikate mund të konsiderohet ajo e Liverpool, që luan në një stadium të zjarrtë si ai i Galatasaray. Kampionët e Anglisë fituan me vështirësi ndaj Atletico Madrid, ndërsa i pret një ndeshje tjetër delikate.
Në krahun tjetër, Atletico pret gjermanët e Eintracht Frankfurt, ndërsa skuadra tjetër madrilene, Reali luan në transfertën kazake ndaj Kairat Almaty.
Në duelet e tjera, Chelsea luan ndaj Benfica-s, Atalanta pret Club Brugge, Tottenham sfidon Bodo/Glimt, ndërsa Marseille dhe Ajax përballen mes tyre në Francë.
