Komisioni për Çështjet Ligjore dhe Administratën Publike, nën drejtimin e kryetarit Ulsi Manja, ka miratuar vendimin për shtimin e përkohshëm të organikës së KQZ-së.
Komisioni miratoi kërkesën e Komisionit Qendror të Zgjedhjeve për punësimin me kohë të pjesshme të 47 punonjësve. Drejtoresha e Përgjithshme e Administrimit Zgjedhor, Jona Josifi, argumentoi se kjo shtesë është e domosdoshme për të përballuar volumin e punës së mbetur nga dy proceset zgjedhore të vitit 2025 (zgjedhjet parlamentare të 11 majit dhe ato të pjesshme vendore të 9 nëntorit).
Sipas vendimit, 15 punonjës do të angazhohen për 8 muaj në procesin e arkivimit, ndërsa 32 të tjerë (kryesisht operatorë dhe punëtorë) do të merren me hapjen e kutive dhe asgjësimin e fletëve të votimit. Efektet financiare do të mbulohen nga buxheti i vetë KQZ-së për vitin 2026.
