Pasuritë e sekuestruara apo të konfiskuara do të administrohen më shpejt dhe nga një institucion i vetëm.
Projektligji i cili sjell ndryshime në ligjin aktual “Për administrimin e pasurive të sekuestruara dhe të konfiskuara” është depozituat për diskutim në komisionet parlamentare, dhe synon përmirësimin e kuadrit ligjor për menaxhimin dhe përdorimin e këtyre aseteve nga shteti.
Ndryshimet parashikojnë zgjerimin e objektit të ligjit, duke përfshirë jo vetëm pasuritë e sekuestruara dhe të konfiskuara nga organet e drejtësisë, por edhe të atyre që konfiskohen nga pushtetit vendor, që janë kryesisht ndërtimet pa leje.
Në kuadër të ndryshimeve, parashikohet krijimi i një fondi të posaçëm të dedikuar për administrimin e ndërtimeve pa leje, me qëllim përdorimin e tyre për funksione zhvillimore, sociale apo institucionale.
Një risi kryesore është parashikimi që Agjencia e Administrimit të Pasurive të Sekuestruara dhe të Konfiskuara të kryejë vetë edhe procedurat e shitjes së pasurive, përveç qiradhënies, përmes ankandit publik, duke marrë drejtpërdrejt përgjegjësinë për vlerësimin, administrimin dhe transferimin e të ardhurave.
Drafti përfshin gjithashtu kriptomonedhat në kategorinë e pasurive të luajtshme që mund të sekuestrohen dhe konfiskohen, duke i dhënë bazë ligjore për herë të parë administrimit të tyre nga institucionet shtetërore.
Sipas relacionit shpjegues, projektligji synon të shkurtojë afatet procedurale të administrimit dhe shitjes së pasurive, të rrisë eficiencën e përdorimit të tyre dhe të kontribuojë në rritjen e të ardhurave publike, pa sjellë kosto shtesë për buxhetin e shtetit.
Diskutimi në komisione parlamentare pritet të fokusohet në mënyrën e zbatimit të risive, mekanizmat e kontrollit dhe rolin e institucioneve përgjegjëse në administrimin e pasurive të sekuestruara dhe të konfiskuara.
