Një pikturë e humbur prej dekadash e mjeshtrit holandez të shekullit XVII, Rembrandt van Rijn, është rizbuluar dhe autentifikuar pas një ekzaminimi 2-vjeçar nga ekspertët e Rijksmuseum në Amsterdam.
Vepra me titull “Vizioni i Zakarisë në Tempull”, e realizuar në vitin 1633, ishte përjashtuar nga katalogu i punimeve të njohura të artistit në vitin 1960. Një vit më pas ajo u shit te një koleksionist privat dhe më pas humbi gjurmët për publikun dhe studiuesit.
Piktura u rikthye në vëmendje kur pronarët aktualë e paraqitën për analizë në Rijksmuseum. Sipas drejtorit të muzeut, Taco Dibbits, momenti i parë kur e pa veprën gjatë restaurimit ishte mbresëlënës.
“Kur e pashë në studion tonë, u godita menjëherë nga fuqia e jashtëzakonshme që përcjell. E dinim se mund të kishim të bënim me diçka të veçantë”, u shpreh ai.
Ekspertët analizuan pigmentet e përdorura, teknikën e shtresëzimit dhe panelin prej druri, duke i krahasuar me vepra të tjera të hershme të Rembrandtit. Sipas muzeut, materialet dhe stili përputhen plotësisht me periudhën kur është realizuar piktura.
Firma në vepër rezulton origjinale, ndërsa analiza e materialeve, ngjashmëritë stilistike dhe cilësia e lartë artistike mbështesin përfundimin se bëhet fjalë për një punim autentik të mjeshtrit holandez.
Dibbits theksoi se piktura i përket kulmit të fazës së hershme të karrierës së Rembrandtit. “Është një vepër e një cilësie shumë të lartë. Me këtë pikturë ndjen se ai i ka kushtuar shpirtin”, tha ai.
Rembrandti ishte vetëm 27 vjeç kur realizoi këtë pikturë, e cila paraqet momentin biblik kur kryeprifti Zakaria njoftohet nga Kryeengjëlli Gabriel se, pavarësisht moshës së thyer, ai dhe bashkëshortja e tij do të bëhen prindër të Gjon Pagëzorit.
Sipas muzeut, artisti i ka dhënë rrëfimit një trajtim novator. Në vend që ta paraqiste drejtpërdrejt Kryeengjëllin Gabriel, ai vetëm sugjeron praninë e tij, duke u larguar nga traditat e kohës dhe duke sjellë një interpretim të ri vizual.
Piktura do të ekspozohet për publikun duke filluar nga dita e mërkurë në ambientet e Rijksmuseum në Amsterdam.
