Lëvizja Vetëvendosje (LVV) ka hedhur hapin e radhës për të përmbyllur procesin e konstituimit të institucioneve të reja në Kosovë, duke propozuar zyrtarisht Glauk Konjufcën si kandidat për postin e Presidentit të Republikës. Ky propozim vjen në një përpjekje për të zhbllokuar ngërçin politik dhe për të shmangur rikthimin e vendit në zgjedhje të parakohshme.
Sipas njoftimit zyrtar të subjektit fitues të zgjedhjeve të 28 dhjetorit 2025, kandidimi i Konjufcës pason përpjekjet e pasuksesshme për të gjetur një figurë konsensuale me partitë e opozitës. Partia në pushtet vlerëson peshën politike të Konjufcës, duke e theksuar profilin e tij si deputet në shtatë legjislatura dhe si personin e dytë më të votuar në historinë e Republikës së Kosovës.
Në një lëvizje për të siguruar mbarëvajtjen e procesit, i cili Kushtetutshmërisht kërkon praninë e të paktën 80 deputetëve në sallë gjatë votimit, Vetëvendosje i ka bërë thirrje bllokut opozitar që të paraqesë një kandidat të vetin. Vetëvendosje ka ofruar edhe nënshkrimet e nevojshme nga grupi i saj parlamentar për të mbështetur propozimin e opozitës, duke synuar kështu legjitimimin e garës demokratike.
Përfaqësuesit e LVV-së theksojnë se vota e qytetarëve ishte një mesazh i qartë kundër bllokimit të shtetit, çka i hapi rrugë formimit të shpejtë të Kuvendit dhe Qeverisë. Pavarësisht ftesave të përsëritura për dialog dhe, sipas LVV-së, ”mungesës së propozimeve konkrete nga ana e opozitës, subjekti qeverisës mbetet i bindur se sfida e zgjedhjes së kreut të shtetit është e kalueshme dhe zgjedhjet janë të evitueshme”.
Fati i këtij procesi thelbësor për stabilitetin e vendit pritet të përcaktohet në seancën parlamentare të planifikuar për t’u mbajtur mbrëmjen e sotme. Zgjedhja e Presidentit mbetet hallka e fundit për të mbyllur plotësisht arkitekturën e re institucionale të dalë nga zgjedhjet e dhjetorit.
