Zvogëlimi i gjoksit dhe heqja e implanteve kanë tejkaluar për herë të parë ndërhyrjet për zmadhim në Britaninë e Madhe.
Auditimi më i fundit vjetor i Shoqatës Britanike të Kirurgëve Estetikë Plastikë (BAAPS) tregon se në vitin 2025 janë kryer 4 mijë e 761 ndërhyrje për zmadhim gjoksi, një rënie prej 8% krahasuar me vitin e kaluar.
Ndërkohë janë regjistruar 4 mijë e 673 ndërhyrje për zvogëlim gjoksi dhe 847 heqje implantesh, ndërsa kirurgët thonë se ky trend pasqyron një zhvendosje drejt komfortit dhe një jetese më aktive, si dhe rritjen e modës “atletike” me veshje sportive dhe të ngushta.
Po ashtu është vërejtur rritje e ndërhyrjeve në fytyrë, përfshirë lifting të fytyrës dhe kirurgji të qepallave. Një nga procedurat me rritjen më të shpejtë është ngritja e vetullave, e cila është rritur me 27%.
Labioplastika, një ndërhyrje kirurgjikale për zvogëlimin, formësimin ose ndryshimin e madhësisë së labieve, është rritur gjithashtu me 6%.
Nora Nugent, presidente e BAAPS, tha se “Për herë të parë po shohim që numri i pacienteve që bëjnë reduktim gjoksi dhe heqje implantesh tejkalon ata që zgjedhin zmadhimin. Kjo pasqyron një zhvendosje më të gjerë larg formave të ekzagjeruara drejt një siluete më natyrale, që përshtatet më mirë me një stil jetese aktiv dhe rritjen e modës athleisure.”
Nugent shtoi se tendenca drejt jetesës aktive mund të shpjegojë edhe rritjen e labioplastikës.
“Në praktikën time, pacientet më shpesh përmendin siklet gjatë ushtrimeve dhe shqetësime për dukshmërinë në veshje të ngushta si ato të palestrës. Veçanërisht, shumë gra më të moshuara thonë se vetëm së fundmi kanë mësuar për labioplastikën si zgjidhje për simptoma që i kanë pasur prej vitesh”, shtoi ajo.
Dr. Anil Joshi, kirurg konsulent për ORL dhe kirurgji plastike të fytyrës, vëren një prirje të ngjashme.
“Pacientët po bëhen më selektivë. Ata janë më pak të interesuar që të duket sikur kanë bërë ndërhyrje të dukshme.”
Ai shtoi se “zmadhimi i gjoksit nuk është zhdukur, por motivimi ka ndryshuar. Gratë tani flasin më shumë për stilin e jetesës sesa për madhësinë e kupës… Heqja e implanteve po rritet për të njëjtën arsye. Shumica e grave nuk po e kthejnë një gabim, por po reflektojnë një fazë të re të jetës.”
Gratë ende përbëjnë 93.9% të të gjitha procedurave, me 25 mijë e 217 operacione të kryera në 2025, një rënie prej 2% nga viti i kaluar. Në total janë kryer 26 mijë e 840 procedura estetike në 2025, gjithashtu 2% më pak se një vit më parë.
Tek meshkujt, procedurat po ndryshojnë, me kirurgjinë e fytyrës që po dominon. Për herë të parë, kirurgjia e qepallave u bë procedura më e zakonshme për meshkujt me 346 ndërhyrje, një rritje prej 8%, duke tejkaluar rinoplastikën, e cila ra në 273 ndërhyrje (-18%).
->Të dhënat janë marrë nga The Guardian dhe i përshtaten Mbretërisë së Bashkuar
