Pse Rama nuk denoncoi Vuçiq për deklaratat kundër sovranitetit të Kosovës? Nga Bujar Leskaj

Nga Bujar Leskaj
Më 20 korrik 2026, gjatë një ceremonie ushtarake në Serbi, presidenti serb Aleksandër Vuçiq pretendoi se Kosova, sipas “Kushtetutës dhe drejtësisë së Zotit”, është pjesë e Serbisë dhe sulmoi aleancat e sigurisë në rajon.
Menjëherë reagoi kryeministri i Kosovës, Albin Kurti, duke i denoncuar deklaratat dhe duke i cilësuar ato si kërcënuese, destabilizuese dhe një përpjekje të dështuar për të cenuar sovranitetin e Kosovës. Kurti u kundërpërgjigj prerazi, duke theksuar se Kosova është më e sigurt se kurrë. Reaguan edhe zyrtarë të Bashkimit Evropian. Por jo Rama! Pse?
Mbrojtja e pavarësisë së Kosovës është interes i yni kombëtar. Përfaqëson pjesë të pandarë dhe shtyllë të politikës së jashtme të Shqipërisë. Ishte detyrim i qeverisë dhe kryeministrit të Shqipërisë të distancohej dhe t’i dënonte këto deklarata, sikurse bëri jo vetëm Kurti, por edhe Bashkimi Evropian!
Po pse nuk e mbajti Rama këtë qëndrim normal dhe të natyrshëm të politikës sonë, në mbrojtje të pavarësisë së Kosovës? Sepse autokrati Vuçiq është sivëllai i tij!
Sepse Rama iu bashkua pseudonismës së Vuçiq për integrim rajonal “Ballkani i Hapur”, që kur ky i fundit e lançoi në vitin 2018, me takimin në Nish të Serbisë. Që të dy u bënë bashkëpromotorë të kësaj nisme të rrezikshme, duke u sjellë si minues të Procesit të Berlinit. Ata e detyruan Procesin e Berlinit të ngadalësonte dukshëm dhe të hapte krahun për vite të tëra, për t’i lënë udhë surrogatit “Ballkani i Hapur”, që e gatuan vetë, duke sjellë izolimin e përkohshëm të Kosovës.
Shqipëria dhe Kosova e kanë të domosdoshëm bashkëveprimin dhe koordinimin diplomatik, në çështje me interes kombëtar, sikurse është çdo cënim i pavarësisë së Kosovës.
Më 14 korrik 2026, Ministria e Brendshme e Kosovës e shpalli “persona non grata” ministren serbe për Administratën Publike dhe Vetëqeverisjen Lokale, Snezhana Paunoviq, duke ia ndaluar përherë hyrjen apo kalimin nëpër Kosovë, pasi ajo u shpreh ditë më parë se do ta kishte “spastruar etnikisht Kosovën” në vitin 1998, njëlloj sikurse u përpoq të bënte Kasapi i Ballkanit Millosheviq.
A nuk duhej të reagonte edhe qeveria e Shqipërisë? Qeveria e Republikës së Shqipërisë duhet ta shpallte dhe bën mirë ta shpallë “persona non grata”, se ende në kohë është, këtë ministre provokatore dhe shoviniste.
Kë mbron Rama dhe sekti i tij në qeverisje me këto mosveprime: Kosovën apo Vuçiqin?