Gruaja e Presidentit kinez Xi Jinping, Peng Liyuan, ka marrë një rol të veçantë gjatë vizitës së udhëheqësit kinez në Uashington, duke u shfaqur si një figurë që synon të përcjellë një imazh më të butë dhe më të afrueshëm të Kinës, në një kohë kur marrëdhëniet mes Pekinit dhe Uashingtonit janë përfshirë nga mosmarrëveshje të forta, nga tregtia dhe inteligjenca artificiale te çështja e Tajvanit.
Gjatë qëndrimit në kryeqytetin amerikan, Peng foli në anglisht me Zonjën e Parë të SHBA-së, Melania Trump, pa ndihmën e një përkthyesi. Ajo u shfaq gjithashtu në një aktivitet kulturor, ku një kor fëmijësh performoi për të këngën tradicionale kineze “Lulja e Jaseminit”. Pas performancës, fëmijët iu drejtuan asaj me fjalët: “Faleminderit, Nënë Peng!”.
Peng, e cila u shfaq me një version modern të veshjeve tradicionale kineze, duartrokiti performancën e fëmijëve në Muzeun Kombëtar të Artit Aziatik Smithsonian në Uashington.
Sipas Reuters, roli i saj gjatë kësaj vizite mund të shihet si pjesë e “fuqisë së butë” të Kinës, duke ndihmuar në përcjelljen e një imazhi më njerëzor të vendit, përtej përplasjeve diplomatike mes dy fuqive.
Ambasadorja kineze në SHBA, Xie Feng, publikoi në platformën X një video nga aktiviteti dhe vuri në dukje rolin e Peng. Sipas saj, ajo i inkurajoi adoleshentët amerikanë të vazhdonin të mësonin gjuhën dhe kulturën kineze dhe të bëheshin “ambasadorë të miqësisë” mes Kinës dhe Shteteve të Bashkuara.
Joe Mazur, analist gjeopolitik në kompaninë konsulente Trivium China me seli në Pekin, tha se Peng “ndihmon në dhënien e një fytyre më njerëzore një diplomacie përndryshe të vështirë dhe krijon momente të ndjenjës pozitive në marrëdhëniet SHBA-Kinë”. Pavarësisht paraqitjes së saj në SHBA, aktivitetet dhe zgjedhjet e veshjeve të Peng gjatë vizitës kanë marrë dukshëm më pak vëmendje në mediat sociale kineze. Kjo lidhet me ndjeshmërinë që rrethon diskutimin publik për jetën personale të udhëheqësve më të lartë politikë të Kinës.
Gratë e liderëve të lartë kinezë kanë mbajtur tradicionalisht një profil të ulët. Një nga arsyet lidhet edhe me përvojën e Chiang Ching, gruas së Mao Ce Dunit dhe një prej figurave kryesore të “Bandës së të Katërve”, e cila ushtroi ndikim të madh gjatë Revolucionit Kulturor.
Chiang Ching u dënua me vdekje në vitin 1981 për rolin e saj në persekutimet gjatë Revolucionit Kulturor, megjithëse dënimi më vonë u zbut.
Peng Liyuan ishte e njohur në Kinë shumë përpara se Xi Jinping të bëhej një nga figurat kryesore të politikës kineze. Ajo është soprano dhe këngëtare e njohur, e cila ka performuar edhe si këngëtare ushtarake.
Me ngjitjen e Xi Jinping në hierarkinë politike gjatë viteve 2000, media kineze fitoi më shumë hapësirë për të raportuar mbi paraqitjet publike të Peng.
Në një intervistë të vitit 2007 me një revistë shtetërore, ajo e përshkroi marrëdhënien me Xi në terma familjarë, duke thënë se kur ai kthehej në shtëpi, ajo nuk mendonte se kishte një udhëheqës në shtëpi, por thjesht bashkëshortin e saj.
Peng ka mbështetur gjithashtu disa kauza sociale, përfshirë çështje që lidhen me njerëzit që jetojnë me HIV/AIDS.
Ajo është gruaja e dytë e Xi Jinping. Çifti ka një vajzë, e cila ka studiuar në Universitetin e Harvardit. Xi ishte divorcuar më parë nga bashkëshortja e tij e parë, vajza e një diplomati kinez.
