Fakulteti i Mjekësisë Dentare mirëpriti studentët e vitit të parë në Ceremoninë e Bluzave të Bardha.
Ceremonia bëri bashkë studentët e tre programeve të studimit: Master i Integruar në Stomatologji, Bachelor në Higjienist Dentar dhe Bachelor në Teknikë Dentare.
Në fjalën e saj përshëndetëse, Dekania e Fakultetit të Mjekësisë Dentare, Prof. Asoc. Dr. Silvana Bara, u uroi studentëve suksese në fillimin e studimeve të tyre, duke i inkurajuar të përkushtohen ndaj dijes dhe profesionit që kanë zgjedhur. Ajo falënderoi gjithashtu profesorët dhe kolegët e pranishëm për kontributin dhe mbështetjen e tyre në formimin e brezit të ri të profesionistëve të mjekësisë dentare.
Zv. Rektorja e Universitetit të Mjekësisë, Tiranë, Prof. Dr. Suela Këllici, përcolli urimet më të mira për studentët dhe i uroi suksese në fillimin e jetës së tyre universitare.
Bluza e bardhë simbolizon përgjegjësi, përkushtim dhe humanizëm – vlera që do t’i shoqërojnë studentët gjatë formimit dhe jetës së tyre profesionale.
Mirë se erdhët në Fakultetin e Mjekësisë Dentare dhe shumë suksese në këtë fillim të ri
