Një ngjarje tragjike ka tronditur rajonin turistik të Kapadokisë në Turqi, ku shembja e një prej formacioneve karakteristike shkëmbore, të njohura si “oxhaqet e zanave”, ka shkaktuar tre viktima dhe pesë të plagosur. Ngjarja ndodhi të mërkurën, pranë hyrjes së muzeut të hapur në Göreme, në një zonë që frekuentohet nga një numër i madh turistësh.
Mes viktimave është një turiste franceze, e identifikuar si Cynthia Francine Marie Madeleine Huppert, si dhe një çift i sapomartuar turk, gazetari Fatih Eray Tuna dhe bashkëshortja e tij, Begüm Çetinkaya Tuna. Sipas mediave lokale, çifti ishte martuar më 5 korrik dhe kishte zgjedhur Kapadokinë për të kaluar pushimet. Vdekja e tyre ka shkaktuar reagime të shumta, ndërsa lajmi për tragjedinë është përhapur edhe në rrjetet sociale.
Guvernatori i distriktit, Hüseyin Köş, deklaroi se shembja dyshohet të jetë shkaktuar nga reshjet e dendura të shiut gjatë ditëve të fundit. Formacioni shkëmbor u shemb pranë një parkingu në hyrje të zonës muzeale. Ekipet e emergjencës vijojnë kërkimet në vendngjarje, për të verifikuar nëse ka persona të tjerë të bllokuar nën rrënoja. “Shpresojmë të mos ketë më viktima. Jemi thellësisht të trishtuar”, u shpreh guvernatori.
Ndërkohë, ministri i Drejtësisë i Turqisë, Akin Gürlek, njoftoi se ka urdhëruar nisjen e një hetimi për të përcaktuar shkaqet e sakta të shembjes dhe për të zbardhur rrethanat e ngjarjes.Kapadokia, e vendosur në Turqinë qendrore, është pjesë e Trashëgimisë Botërore të UNESCO-s dhe një prej destinacioneve më të njohura turistike të vendit. Rajoni tërheq vizitorë nga e gjithë bota për shkak të formacioneve të pazakonta shkëmbore, qyteteve të lashta nëntokësore dhe peizazheve karakteristike. Shembja ndodhi gjatë festimeve për Ditën e Republikës së Turqisë, periudhë kur zona pritej të priste një numër të madh vizitorësh.
