Përmbajtja e një pakete ishte deklaruar si “xhaketë mode dhe pëlhurë batik”, por një qen i specializuar për zbulimin e produkteve të specieve të mbrojtura dha alarmin në aeroportin Leipzig/Halle në Gjermani. Çfarë gjetën doganierët.
Lëkura pitoni në vend të pëlhurës: Gjatë një kontrolli në aeroportin Leipzig/Halle në Gjermani, dogana ka zbuluar 32 lëkura pitoni të trafikuara.
Një qen i specializuar për zbulimin e produkteve të specieve të mbrojtura kishte sinjalizuar praninë e tyre në paketë gjatë natës, njoftoi Drejtoria Kryesore e Doganave në Dresden.
Përmbajtja ishte deklaruar si “Fashion jacket and batik cotton” (xhaketë mode dhe pëlhurë batik prej pambuku).
Në të vërtetë, punonjësit gjetën lëkura kafshësh të ngjyrosura në blu, të kuqe dhe të zezë, me gjatësi nga 340 deri në 450 centimetra, si dhe katër copa të tjera materiali.
Pitoni dhe produktet e përftuara prej tij, si për shembull lëkurat dhe artikujt prej lëkure, i nënshtrohen kufizimeve tregtare në bazë të legjislacionit për mbrojtjen e specieve.
Në paketë mungonin dokumentet që do të mundësonin kalimin e saj tranzit përmes Bashkimit Evropian.
Për këtë arsye, dërgesa e nisur nga Indonezia dhe e adresuar për në Shqipëri u sekuestrua.
