Operacioni i kthimit rezultoi edhe më i vështirë…
Një ngjarje e rëndë është regjistruar në Alpet Austriake, ku dy alpinistë gjermanë braktisën shokun e tyre 20-vjeçar në një lartësi prej 2,600 metrash, pasi i riu u rraskapit dhe shfaqi shenja hipotermie gjatë një stuhie të fortë dëbore. Tre të rinjtë kishin nisur ngjitjen në malin Hochkönig, në zonën e Salzburgut, pavarësisht paralajmërimeve për përkeqësimin e motit. Kur 20-vjeçari nuk mundi të vazhdonte më, dy shoqëruesit e lanë vetëm dhe vijuan rrugën.
Sipas raportimeve nga mediat e huaja, i riu arriti të telefononte shërbimet e emergjencës rreth orës 19:00, duke kërkuar ndihmë. Për shkak të stuhisë dhe errësirës, ndërhyrja me helikopter ishte e pamundur, ndaj 11 shpëtues u nisën drejt tij në këmbë. Pas më shumë se pesë orësh ngjitjeje në kushte ekstreme, ekipet arritën ta gjenin pak para mesnatës. Operacioni i kthimit rezultoi edhe më i vështirë për shkak të borës së dendur, akullit dhe rrezikut të ortekëve të vegjël.
Shpëtuesit arritën ta nxirrnin të riun në siguri në orën 08:18 të mëngjesit, pas një operacioni që zgjati më shumë se 13 orë. Ndërkohë, policia malore austriake ka nisur hetimet për të zbardhur rrethanat e ngjarjes dhe veprimet e dy alpinistëve që e lanë shokun e tyre në mal. Ngjarja ka rikthyer vëmendjen te rreziqet e ngjitjeve malore pa marrë parasysh kushtet atmosferike dhe paralajmërimet e autoriteteve.
