ista Studentore në Serbi ka prezantuar një paketë propozimesh për ndryshimin e tregut të punës dhe zgjerimin e të drejtave sociale. Një nga nismat kryesore është vendosja e javës katërditore të punës, me 32 orë në javë dhe pa reduktim të pagës.
Sipas programit, ky model do të ishte vullnetar dhe do të zbatohej nga punëdhënësit që vendosin ta adoptojnë. Paketa parashikon gjithashtu kufizimin e kontratave me afat të caktuar në jo më shumë se 12 muaj, si dhe mbrojtje më të fortë për punonjësit nga largimet e padrejta.
Një tjetër pikë e rëndësishme lidhet me pagesën shtesë për ata që punojnë gjatë festave zyrtare, të dielave, në turnet e natës apo jashtë orarit të përcaktuar.
Propozimet përfshijnë edhe zgjerimin e të drejtave prindërore. Lista Studentore kërkon që pushimi i lehonisë të garantohet pavarësisht llojit të kontratës së punës, ndërsa baballarëve t’u mundësohen tre muaj pushim pas lindjes së fëmijës. Për pushimin mjekësor gjatë 30 ditëve të para propozohet kompensim prej të paktën 75% të pagës.
Në paketë është përfshirë edhe e drejta e punonjësve për të mos iu përgjigjur telefonatave apo mesazheve të punës pas përfundimit të orarit zyrtar. Gjithashtu, parashikohet mbrojtje më e madhe për personat që punojnë përmes platformave digjitale.
Reforma prek edhe sistemin e pensioneve, ku propozohet indeksimi i tyre dy herë në vit, mbështetje më e madhe për pensionistët me të ardhura të ulëta dhe krijimi i një pensioni social për personat mbi 65 vjeç që nuk përfitojnë pension nga kontributet.
Megjithatë, këto masa janë ende pjesë e programit politik të Listës Studentore dhe nuk përbëjnë ndryshime ligjore të miratuara. Për t’u zbatuar, propozimet do të kërkonin ndërhyrje në legjislacionin aktual të Serbisë.
