Mbi 350 mijë qytetarët u mblodhën të dielën në Pragë të Çekisë, në një nga protestat më të mëdha në historinë e vendit, kundër planit të qeverisë për ndryshimin e mënyrës së financimit të mediave publike.
Protestuesit kundërshtojnë heqjen e tarifës së detyrueshme që financon televizionin dhe radion publike, duke paralajmëruar se kalimi i financimit në buxhetin e shtetit mund t’i japë qeverisë më shumë ndikim mbi pavarësinë editoriale të mediave.
Tubimi u zhvillua në sheshin Letná, simbol i Revolucionit të Kadifenjtë të vitit 1989, ku iu dha fund më shumë se 40 viteve të sundimit komunist në vend.
Protestuesit mbanin pankarta me mesazhe si “Nuk do t’ia dorëzojmë mediat askujt” dhe “Duart larg nga media”, ndërsa shumë prej tyre kishin vendosur kapele prej letre, të frymëzuara nga personazhi i animuar Večerníček, i kthyer në simbol të protestës.
Unioni Evropian i Transmetimeve, Federata Evropiane e Gazetarëve, Reporterët pa Kufij dhe Instituti Ndërkombëtar i Shtypit e kanë kritikuar gjithashtu planin mediatik të qeverisë, duke e krahasuar atë me lëvizjet kontraverse të kryeministrit të Sllovakisë, Robert Fico, dhe ish-kryeministrit të Hungarisë, Viktor Orbán.
Nga ana tjetër, kryeministri Andrej Babiš ka hedhur poshtë akuzat, duke deklaruar se qeveria nuk ka ndërmend të ndërhyjë në punën editoriale të mediave publike.
