Nga Sabah Sheta
Si qytetar krutan dhe si kryetar i degës së PD Krujë, dua të falënderoj secilin që na u bashkua në protestën tonë kundër padrejtësisë që po na bëhet. Sot bashkë ishim sërish të vendosur në të drejtë që na takon.
Qytetarët e Krujë, Fushë-Krujës, Niklës, Cudhisë, Bubqit dhe Thumanës nuk duan dhe nuk do të pranojnë izolimin që po iu bën investimi i rrugës Thumanë-Kashar. Rezistenca jonë do të vazhdojë të rritet dhe bashkë më të edhe zemërimi ndaj asaj që po i bëhet zonës sonë administrative.
Pas protestave tona për të kërkuar informacion, qeveria na ka konfirmuar tashmë izolimin e 85 mijë banorëve dhe mijëra biznese, por nuk ka dhënë një zgjidhje! Heshtja qeveritare është e papranueshme për ne. Kruja e kulturës dhe historisë nuk e meriton këtë që po i ndodh dhe nuk do të pajtohet me këtë ndëshkim qeveritar.
Apeli im për çdo krutan është: Pavarësisht bindjeve politike, të zgjedhurit vendorë dhe qendrorë, përfaqësuesit në Kuvendin e Shqipërisë të të gjitha kaheve politike të vëmë Krujën të parën dhe t’i kërkojmë institucioneve qeveritare që të marrin parasysh kërkesën e t’i japin zgjidhje problemit.
Të vëmë Krujën të parën dhe jo interesat individuale apo politike. Protestat do të vijojnë dhe më të fuqishme, nuk do të ketë asnjë hap pas!
