Capranica Prenestina është vendi ku është vendosur memoriali i Ilaria Sulës, studentes shqiptare e cila u gjet e vrarë në Itali nga i dashuri i saj Mark Samson.
Në kujtim të vajzës së tyre, nëna dhe babai i Ilarias kanë shkruar mbi memorial “Do të të dërgoj një puthje me erën dhe e di që do ta ndjesh, do të kthehesh dhe nuk do të më shohësh, por unë do të jem aty.”
“Faleminderit të gjithëve, Bashkisë dhe kryetarit të bashkisë Capranica Prenestina me zemër të madhe për gjithçka që u lejua të bëhej për vajzën time Ilaria”, komentoi babai i saj Flamur Sula.
I pranishëm ishte edhe kryetari i bashkisë së Capranicas, Francesco Colagrossi. “Kjo hapësirë që shikon drejt horizontit dhe nga e cila në ditët më të kthjellëta, kur era e veriut i largon retë, mund të shohësh detin, do të jetë vendi i kujtimit tënd, Ilaria e ëmbël, dhe do të na çojë të reflektojmë mbi kuptimin e jetës, mbi vlerën e saj, mbi mënyrën se si të mbrohemi nga një dashuri e sëmurë dhe shkatërruese.”-tha kryebashkiaku.
Ilaria Sula do të festonte ditëlindjen e saj të 23-të, sot më 20 maj. Ndërkohë që hetimet për ngjarjen vijojnë, 23-vjeçari Mark Samson, ka refuzuar një nga dy avokatët e tij, Fabrizio Gallo.
Lajmi mbërriti sot, së bashku me përgjigjen e avokatit, i cili përsëriti se në muajt e fundit ai ishte përpjekur vetëm të nxirrte të vërtetën, “në një kontekst tashmë serioz ku përgjegjësia e tij, përveçse është tashmë e përcaktuar, është e qartë”.
