Drejtori ekzekutiv i kompanisë së teknologjisë ‘Astronomer’ ka dhënë dorëheqjen pasi lidhja e tij e paligjshme u zbulua në një video nga një koncert i Coldplay që u bë virale.
Kompania e teknologjisë tha se CEO Andy Byron ka paraqitur dorëheqjen e tij dhe se bordi e ka pranuar atë.
“Kompania Astronomer është e përkushtuar ndaj vlerave dhe kulturës që na kanë udhëhequr që nga themelimi ynë”, tha kompania në një deklaratë.
“Bordi do të fillojë kërkimin për CEO-n tonë të ardhshëm, pasi bashkëthemeluesi dhe drejtori kryesor i produkteve Pete DeJoy do të vazhdojë të shërbejë si CEO i përkohshëm.”
Marrëdhënia e paligjshme midis CEO-s së kompanisë së softuerëve Astronomer, Andy Byron, dhe drejtueses së Burimeve Njerëzore të kompanisë, Christine Cabot, u zbulua nga një kamera puthjeje në koncertin e Coldplay në Boston të mërkurën, më 16 korrik.
Përdoruesit e internetit u përpoqën të “lexonin” buzët e dy protagonistëve. Konkretisht, shumë pretendojnë se kur Byron vuri re kamerën mbi ta, ai bërtiti “në djall, jam unë”, ndërsa Cabot, dukshëm e tronditur, i pëshpëriti “është e sikletshme”.
Gjithashtu me çiftin e paligjshëm në koncert ishte edhe shoqja e Cabot, Alyssa Stoddard, e cila thuhet se është ngritur në detyrë së fundmi në të njëjtën kompani falë saj.
Prania e saj për shumë përdorues të mediave sociale sugjeron se marrëdhënia e CEO-s me kreun e burimeve njerëzore ndoshta nuk ishte e panjohur.
