Në një samit të liderëve botërorë që do të mbahet sot në Sharm el-Sheikh të Egjiptit, të bashkëkryesuar nga Presidenti i SHBA-së Donald Trump dhe Presidenti egjiptian Abdel Fattah al-Sisi , Shtetet e Bashkuara, Egjipti, Katari dhe Turqia pritet të miratojnë “parimet e përgjithshme” të planit të Trump për t’i dhënë fund luftës në Rripin e Gazës, sipas një zyrtari të administratës amerikane që foli për The Times of Israel.
Eventi, në të cilin do të marrin pjesë më shumë se 20 liderë ndërkombëtarë përfshirë edhe Sekretarin e Përgjithshëm të OKB-së Antonio Guterres , synon të riafirmojë mbështetjen e katër fuqive garantuese për kornizën ekzistuese të planit 20-pikësh.
Siç shpjegoi zyrtari amerikan, qëllimi është të arrihet një marrëveshje “mbi vijat e gjera” të kornizës, me theks në forcimin e mbështetjes ndërkombëtare nga garantuesit e planit – dhe jo nga palët e përfshira në konflikt, siç janë Izraeli, Hamasi ose Autoriteti Palestinez.
Mungesa e Izraelit dhe Autoritetit Palestinez
Sipas burimeve të cituara nga The Times of Israel, Izraeli nuk është ftuar të marrë pjesë në samit. Në të njëjtën kohë, një kërkesë nga Autoriteti Palestinez drejtuar Presidentit Sisi për një ftesë mbeti pa përgjigje, tha zyrtari amerikan.
Edhe pse Irani nuk është në listën zyrtare të të ftuarve, Axios raportoi se Teherani ka marrë gjithashtu një ftesë për të marrë pjesë në konferencë.
Samiti, siç vëren pala amerikane, mund të hapë rrugën për një proces më të gjerë të normalizimit të marrëdhënieve me Izraelin në nivel rajonal – një qëllim i përbashkët si për administratën Trump ashtu edhe për udhëheqjen izraelite.
Një zëdhënës i presidencës egjiptiane tha dje se takimi në Sharm el-Sheikh synon “t’i japë fund luftës në Gaza, të forcojë përpjekjet për paqe dhe stabilitet në Lindjen e Mesme dhe të sjellë një epokë të re sigurie dhe stabiliteti rajonal”.
