Një ngjarje tragjike ka tronditur familjen e këngëtares italiane Laura Pausini.
Xhaxhai i saj, Ettore Pausini, ka humbur jetën në një aksident rrugor të ndodhur në periferi të Bolonjës, pasi u godit nga një makinë që më pas u largua me shpejtësi nga vendngjarja.
78-vjeçari, një çiklist i apasionuar dhe figurë e njohur në shoqatën Onconauti, po kthehej nga një prej udhëtimeve të tij të zakonshme me biçikletë në Via degli Stradelli Guelfi, midis Castenasos dhe San Lazzaro di Savena, kur u përplas ballë për ballë nga një Opel Astra e vjetër me ngjyrë të çelët. Përplasja ishte fatale dhe, pavarësisht përpjekjeve të ekipeve të emergjencës për ta ringjallur, Pausini nuk mundi të mbijetojë.
