Dramaturgu i njohur britanik Tom Stoppard, një nga emrat më të mëdhenj të teatrit bashkëkohor dhe fitues i çmimit “Oscar” për skenarin e filmit “Shakespeare in Love”, ka ndërruar jetë në moshën 88-vjeçare.
Lajmi u konfirmua nga agjencia United Agents, e cila njoftoi se Stoppard u nda nga jeta qetësisht në banesën e tij në Dorset, në jug të Anglisë, pranë familjes së tij.
Në deklaratën zyrtare thuhet se ai do të mbahet mend për veprat e tij brilante, humanizmin, humorin dhe dashurinë e pakufishme për gjuhën angleze. Lajmi ka ngjallur reagime të shumta në botën e artit dhe kulturës.
Mick Jagger, këngëtari legjendar i Rolling Stones, e cilësoi Stoppard-in si dramaturgun e tij të preferuar, duke e quajtur trashëgiminë e tij “madhështore”.
Siç shkruan Associated Press, teatrot e West End në Londër pritet t’i fikin dritat për dy minuta të martën në orën 19:00, në nder të figurës së tij.
Një jetë mes artit, historisë dhe letërsisë
I lindur në vitin 1937 në Çekosllovaki, Stoppard u largua nga vendi gjatë Luftës së Dytë Botërore dhe më vonë u vendos në Britani, ku filloi karrierën si gazetar në moshën 17-vjeçare. Ai u bë i njohur ndërkombëtarisht me dramën “Rosencrantz and Guildenstern Are Dead”, që rishikon “Hamlet”-in nga perspektiva e dy personazheve të vegjël.
Gjatë karrierës së tij 60-vjeçare, ai shkroi një sërë veprash të suksesshme teatrale, pesë prej të cilave fituan çmimin prestigjioz Tony. Dramaturgjia e tij preku tema nga shkenca te filozofia, historia, romantizmi dhe tragjeditë e shekullit XX.
Një nga veprat e tij më të fundit, “Leopoldstadt”, u frymëzua nga historia e tij familjare dhe humbjet e mëdha që familja e tij përjetoi gjatë Holokaustit.
Nga kinemaja te televizioni
Përveç teatrit, Stoppard la gjurmë të rëndësishme edhe në kinematografi dhe televizion. Ai është bashkautori i skenarit të filmit “Shakespeare in Love”, për të cilin fitoi çmimin Oscar. Ai shkroi gjithashtu për filmat “Brazil”, “Empire of the Sun”, “Enigma” dhe “Anna Karenina”, si edhe serialin e suksesshëm “Parade’s End”.
Në vitin 1997, ai u nderua me titullin “Sir” nga Mbretëresha Elizabeth II për kontributin e tij në letërsi.
Stoppard u konsiderua si një kampion i lirisë së fjalës dhe mbështetës i të drejtave të njeriut, ndërsa veprat e tij shpesh ndërthurën humorin, intelektin dhe dhimbjen njerëzore.
Ai u martua tri herë dhe la pas katër fëmijë, përfshirë aktorin Ed Stoppard, si dhe disa nipër e mbesa.
Bota e artit dhe kulturës humbi një prej mendjeve më të ndritura të kohës, ndërsa veprat e tij do të vazhdojnë të lihen si trashëgimi për brezat e ardhshëm.
