E ngarkuara me punë e ambasadës amerikane në Tiranë, Nancy VanHorn, është takuar sot, 12 janar, me kryetaren e sapoemëruar të Gjykatës Kushtetuese, Fiona Papajorgji, të cilën e përgëzoi për detyrën e re.
Siç bën me dije ambasada amerikane, VanHorn, ka diskutuar se si mbështetja afatgjatë e SHBA-ve për institucionet e zbatimit të ligjit në Shqipëri çon përpara prioritetet e Presidentit amerikan, Donald Trump që janë çmontimi i rrjeteve të narkotrafikut dhe krijimi i kushteve të barabarta për bizneset amerikane.
Ambasada thotë se Gjykata Kushtetuese luan një rol të rëndësishëm në garantimin e drejtësisë për qytetarët shqiptarë dhe bën që të lulëzojnë edhe bizneset amerikane.
“Sot, e Ngarkuara me Punë Nancy VanHorn përgëzoi Kryetaren e sapoemëruar të Gjykatës Kushtetuese Fiona Papajorgji dhe diskutoi se si mbështetja afatgjatë e Shteteve të Bashkuara për institucionet e zbatimit të ligjit në Shqipëri çon përpara prioritetet e Presidentit Trump: çmontimin e rrjeteve të narkotrafikut dhe krijimin e kushteve të barabarta për bizneset amerikane. Gjykata Kushtetuese luan një rol të rëndësishëm në garantimin e drejtësisë për qytetarët shqiptarë, duke i mbajtur përgjegjës ata që shkelin ligjet e saj dhe duke ruajtur një sistem ligjor të drejtë dhe të parashikueshëm, në mënyrë që bizneset amerikane të mund të lulëzojnë”, thuhet në postimin e Ambasadës Amerikane.
