Hija e skandaleve financiare është rikthyer sërish mbi gjigantin bankar gjerman. Mëngjesin e së mërkurës, zyrat qendrore të Deutsche Bank në Frankfurt dhe degët e saj në Berlin u bastisën nga hetuesit gjermanë, në kuadër të një hetimi të gjerë për pastrim parash.
Aksioni i befasishëm vjen në një moment kritik për bankën më të madhe të Gjermanisë, vetëm 24 orë para se ajo të publikojë raportin e saj financiar vjetor për vitin 2025.
Çfarë po hetohet?
Sipas zyrës së Prokurorit Publik në Frankfurt, fokusi i hetimit nuk është ende te drejtuesit e lartë me emra konkretë, por te “punonjës të paidentifikuar”. Dyshimet lidhen me marrëdhëniet e biznesit që banka ka mbajtur me subjekte të huaja, të cilat dyshohet se janë përdorur si kanale për pastrimin e parave të pista.
Megjithëse prokuroria refuzoi të japë detaje mbi vëllimin e transaksioneve, natyra e bastisjes në dy qytete kryesore sugjeron një hetim serioz dhe të koordinuar.
Reagimi i bankës
Në një deklaratë të shkurtër për mediat, Deutsche Bank konfirmoi praninë e autoriteteve në ambientet e saj:
“Konfirmojmë që zyra e prokurorit publik të Frankfurtit ndodhet në zyrat tona. Banka po bashkëpunon plotësisht me zyrën e prokurorit publik. Nuk mund të komentojmë më tej.”
Kjo nuk është hera e parë që Deutsche Bank përballet me stuhi rregullatore. Banka ka një histori të gjatë përplasjesh me ligjin, të cilat kanë dëmtuar reputacionin dhe financat e saj:
Në 2017, skandali rus), banka u gjobit me 629 milionë dollarë nga rregullatorët amerikanë dhe britanikë për dështimin në kontrollet e brendshme, çka lejoi pastrimin e rreth 10 miliardë dollarë fonde të paligjshme nga Rusia, skema e njohur si “mirror trading”.
Në 2017 Rezerva Federale e SHBA e gjobiti me 41 milionë dollarë shtesë për mangësi në sistemet kundër pastrimit të parave.
Në 2018, manipulim tregu, rregullatorët e Nju Jorkut vendosën një gjobë prej 205 milionë dollarësh për manipulim të tregut të këmbimit valutor.
Çfarë pritet?
Ky zhvillim pritet të ketë ndikim të menjëhershëm në tregjet financiare dhe të hedhë hije dyshimi mbi raportin e fitimeve që do të publikohet nesër. Investitorët do të jenë të vëmendshëm për të parë nëse banka ka krijuar provigjione (rezerva financiare) për të përballuar gjoba të mundshme ligjore që mund të rrjedhin nga ky hetim i ri.
Ekspertët ligjorë shpjegojnë se në thelb, hetimi synon të zbulojë nëse sistemet e bankës dështuan sërish në identifikimin e transaksioneve që maskojnë origjinën kriminale të fondeve, duke i bërë ato të duken legjitime.
