Parlamenti Evropian ka vendosur të rifillojë procesin e ratifikimit të marrëveshjes tregtare me Shtetet e Bashkuara, duke i dhënë fund pezullimit të shkaktuar nga tensionet diplomatike mbi sovranitetin e Grenlandës.
Vendimi u mor sot në Bruksel nga Komiteti i Tregtisë Ndërkombëtare, duke sinjalizuar një zbutje të qëndrimit të BE-së pas deklaratave të mëparshme të Presidentit amerikan, Donald Trump.
Drita jeshile për votim
Bernd Lange, kryetari socialist i Komitetit të Tregtisë Ndërkombëtare (S&D), konfirmoi se rruga për miratimin e paktit është hapur sërish. Pas takimit me raportuesit e grupeve politike, Lange bëri të ditur kalendarin e ri.
“Shumica e raportuesve në hije vendosën sot të rifillojnë punën mbi dy tekstet e marrëveshjes. Për këtë arsye, një votim mund të mbahet që në mbledhjen e ardhshme të komisionit, e cila është planifikuar për të martën, më 24 shkurt,” deklaroi Lange pas mbledhjes.
Konteksti i përplasjes
Marrëveshja për heqjen e tarifave, e cila synon të lehtësojë shkëmbimet tregtare midis dy fuqive ekonomike, ishte lënë “në sirtar” nga Parlamenti Evropian si shenjë proteste.
Shkak u bënë komentet dhe qëndrimet e Presidentit të SHBA-së lidhur me blerjen e mundshme të Grenlandës, veprim që u interpretua nga Brukseli si cënim i sovranitetit territorial europian dhe mungesë respekti ndaj aleatëve.
Rifillimi i punës tregon se palët po kërkojnë të normalizojnë marrëdhëniet tregtare, pavarësisht fërkimeve gjeopolitike.
