Dy të rinj u arrestuan sot nga Policia e Durrësit, pasi akuzohen për një seri grabitjesh dhe vjedhjesh në qytetin bregdetar, deri edhe me dhunë në një rast.
Objektiv i tyre ishin kryesisht bizneset, dyqane dhe markete, ku kanë marrë shuma parash, mallra dhe sende të tjera materiale.
Burime zyrtare të policisë thanë se të arrestuarit janë Anxhelo Dollaku dhe Paulo Muho.
Nga hetimet e deritanishme rezulton nga krahasimi i pamjeve filmike, provave dhe gjurmëve se ata janë autorë të vjedhjeve të dy marketeve, një pastiçerie dhe një dyqani.
Në një nga vjedhjet në market, autori dallohet teksa merr me forcë nga arka paratë, kurse punonjësja e pafuqishme dhe e trembur nuk e ndalon dot.
Njoftimi i Policisë Durrës:
“Vijon zbatimi i planit operacional të koduar “Siguria”.
Në kuadër të këtij plani, gjatë 12 orëve të fundit u finalizuan 2 operacione, “Arka” dhe “Broken”.
Zbardhen dhe dokumentohen me prova ligjore 5 raste vjedhjesh në dyqane, markete dhe pastiçeri.
Vidhnin shuma parash, mallra dhe sende të ndryshme, vihen në pranga 2 shtetas.
Vijon puna intensive për zbardhjen dhe dokumentimin e disa vjedhjeve të tjera.
Në zbatim të detyrave të përcaktuara në planin operacional të koduar “Siguria”, shërbimet e Komisariatit të Policisë Durrës, gjatë 12 orëve të fundit, bazuar edhe në informacione të siguruara në rrugë operative, kanë organizuar dhe finalizuar 2 operacione për zbardhjen e vjedhjeve.
Në kuadër të këtyre operacioneve u vunë në pranga shtetasit A. D., 27 vjeç, banues në Durrës, dhe P. M., 27 vjeç, banues në Durrës.
Nga hetimet ka rezultuar se shtetasi A. D. është autor i disa vjedhjeve të ndodhura në qytetin e Durrësit, konkretisht:
-në një piceri, të ndodhur në lagjen nr. 6;
-në një dyqan, të ndodhur në lagjen nr. 5;
-në një market, të ndodhur në lagjen nr. 8.
Ndërsa shtetasi P. M., 27 vjeç, rezulton se është autor i vjedhjeve:
-në një pastiçeri, të ndodhur në lagjen nr. 12;
-në një market, të ndodhur në lagjen nr. 18.
Në bashkëpunim me Prokurorinë, vijon puna për dokumentimin me prova ligjore të disa vjedhjeve të tjera të kryera nga këta shtetas. Materialet procedurale iu referuan Prokurorisë së Durrësit, për veprime të mëtejshme”.
