Administrata e Donald Trump ka ngrirë 344 milionë dollarë në kriptovaluta që autoritetet amerikane pretendojnë se janë të lidhura me Iran, në një përpjekje për të rritur presionin ekonomik ndaj Teheranit.
Sipas raportimeve të CNN, masa është pjesë e një strategjie më të gjerë për forcimin e sanksioneve, në një kohë kur përpjekjet diplomatike mbeten të bllokuara dhe situata ndërkombëtare vijon të jetë e tensionuar.
Sekretari i Thesarit i SHBA-së, Scott Besant, deklaroi se autoritetet kanë ndërmarrë veprime ndaj disa portofolave dixhitalë të lidhur me Iranin. “Ne do të ndjekim rrjedhën e parave që Teherani po përpiqet të nxjerrë nga vendi dhe do të synojmë çdo rrugë financiare të lidhur me regjimin”, tha ai.
Zyrtarët amerikanë thonë se Banka Qendrore e Iranit ka përdorur metoda gjithnjë e më të sofistikuara për të fshehur përfshirjen e saj në transaksione ndërkufitare duke përdorur asete dixhitale, që synojnë të lehtësojnë tregtinë ndërkombëtare nën sanksione.
Departamenti i Thesarit i SHBA-së është në komunikim të vazhdueshëm me institucionet financiare amerikane dhe ndërkombëtare, duke përfshirë bursat e kriptomonedhave, thanë burimet.
Vendet nën sanksione të rënda, si Irani, Rusia dhe Koreja e Veriut, po i drejtohen gjithnjë e më shumë kriptomonedhave, të cilat janë më pak të rregulluara se bankat tradicionale, për të gjeneruar të ardhura dhe për të anashkaluar kufizimet.
Sipas firmës analitike të blockchain Chainalysis, zotërimet e kriptomonedhave në Iran arritën në 7.8 miliardë dollarë në vitin 2025, duke shënuar një rritje më të shpejtë se në vitin 2024.
Trupat e Gardës Revolucionare Islamike thuhet se mbajtën rreth gjysmën e këtyre zotërimeve në tremujorin e fundit të vitit 2025, “duke reflektuar pozicionin e tyre dominues në ekonominë iraniane”, sipas Chainalysis.
