Jeff Bezos dhe Lauren Sánchez thuhet se kanë premtuar një donacion prej rreth 10 milionë dollarësh për të sponsorizuar Met Gala 2026, sipas burimeve të cituara nga Page Six.
Met Gala, e konsideruar si nata më e madhe e modës në botë, përdor të ardhurat për të mbështetur Qendrën e Kostumeve “Anna Wintour” në Muzeun Metropolitan të Artit në New York City. Çifti Bezos–Sánchez do të shërbejë gjithashtu si bashkëkryetarë nderi të eventit, së bashku me emra të njohur si Beyoncé, Nicole Kidman, Venus Williams dhe Anna Wintour.
Sipas ish-redaktorit të Vogue, William Norwich, çifti Bezos përfaqëson “mishërimin e ëndrrës amerikane për sa i përket statusit, pasurisë dhe stilit”, duke shtuar se ata kanë edhe mbështetjen e Anna Wintour.
Megjithatë, në industrinë e modës ka edhe reagime kritike, ku disa e shohin afrimin e Met Gala me figura të mëdha të biznesit si një ndryshim nga karakteri tradicional i eventit, i cili dikur fokusohej më shumë te arti dhe krijimtaria në modë.
Lauren Sánchez kishte marrë më herët vëmendje në botën e modës pas shfaqjes në kopertinën dixhitale të Vogue dhe dasmës së saj në Venecia, ku morën pjesë figura të njohura si Kim Kardashian, Oprah Winfrey dhe Leonardo DiCaprio.
Sipas burimeve, sponsorizimi i çiftit Bezos për Met Gala 2026 mund të arrijë deri në 20 milionë dollarë, ndërsa emri i tyre do të figurojë në materialet zyrtare të eventit.
