Tensionet në Gjirin Persik janë rritur sërish pasi Emiratet e Bashkuara Arabe deklaruan se kanë interceptuar 15 raketa dhe katër dronë të lëshuara nga Irani, duke paralajmëruar se ruajnë të drejtën për t’iu përgjigjur sulmeve që i cilësuan si “tradhtare”.
Sulmet e së hënës shënojnë herën e parë që Emiratet janë vënë në shënjestër që nga marrëveshja e armëpushimit mes Iranit dhe Shteteve të Bashkuara më 8 prill.
Sipas autoriteteve të Emirateve, një sulm me dron shkaktoi një zjarr “të madh” në Zonën Industriale të Naftës në Fujairah dhe plagosi tre shtetas indianë. Zyrtarët thanë gjithashtu se Irani goditi një anije të zbrazët nafte që i përkiste kompanisë shtetërore, ndërsa po përpiqej të kalonte nëpër Ngushticën e Hormuzit.
Irani ka mohuar akuzat e Emirateve.
Reagimet ndërkombëtare:
Gjermania
Kancelari Friedrich Merz i dënoi fuqishëm sulmet dhe kërkoi që Irani të rikthehet në tryezën e negociatave dhe të ndalë bllokadën e Ngushticës së Hormuzit.
Kanadaja
Kryeministri Mark Carney dënoi sulmet “të paprovokuara” dhe shprehu solidaritet me popullin e Emirateve, duke bërë thirrje për ulje të tensioneve dhe zgjidhje diplomatike.
Franca
Presidenti Emmanuel Macron i cilësoi sulmet si “të pajustifikuara dhe të papranueshme” dhe premtoi mbështetje të vazhdueshme për aleatët në rajon.
Mbretëria e Bashkuar
Kryeministri Keir Starmer dënoi sulmet dhe bëri thirrje për dialog, duke theksuar nevojën për të shmangur përshkallëzimin dhe për të ruajtur armëpushimin në Lindjen e Mesme.
Këshilli i Bashkëpunimit të Gjirit
Organizata rajonale dënoi sulmet “me termat më të ashpër”, duke i cilësuar si kërcënim serioz për sigurinë e rrugëve detare.
Bashkimi Europian
Presidentja e Komisionit Europian Ursula von der Leyen dënoi sulmet, duke i quajtur ato “shkelje të qartë të sovranitetit dhe ligjit ndërkombëtar” dhe theksoi se siguria në rajon ka pasoja të drejtpërdrejta për Evropën.
Ajo shtoi se BE do të vazhdojë të punojë për uljen e tensioneve dhe një zgjidhje diplomatike të qëndrueshme.
Arabia Saudite
Ministria e Jashtme saudite dënoi “me termat më të ashpër” shënjestrimin nga Irani të objekteve civile dhe ekonomike në Emirate, si dhe ndaj një anije që i përkiste një kompanie emirate.
“Mbretëria shpreh solidaritetin e saj me Emiratet e Bashkuara Arabe dhe u bën thirrje autoriteteve iraniane të ndalin këto sulme,” thuhet në deklaratë.
Katari
Katari dënoi “fuqishëm sulmet e reja iraniane” dhe i cilësoi ato si “shkelje flagrante të sovranitetit të Emirateve dhe kërcënim serioz për sigurinë dhe stabilitetin rajonal”. Gjithashtu shprehu solidaritet të plotë me Emiratet.
Kuvajti
Ministria e Jashtme e Kuvajtit kritikoi “agresionin e dënueshëm” të Iranit, duke theksuar se sulmet përbëjnë kërcënim të drejtpërdrejtë për navigimin detar në Ngushticën e Hormuzit dhe shkelje të parimit të lirisë së lundrimit.
Bahreini
Bahreini denoncoi “sulmet terroriste iraniane”, duke i cilësuar si një përshkallëzim të rrezikshëm që kërcënon stabilitetin rajonal. Po ashtu kërkoi ndërhyrjen e Këshillit të Sigurimit të OKB-së.
Jordania
Ministri i Jashtëm Ayman Safadi dënoi sulmet, duke i cilësuar si “kërcënim për sigurinë dhe integritetin territorial të Emirateve” dhe “shkelje të hapur të ligjit ndërkombëtar”.
