Komisioni Evropian ka ndërmarrë një masë të rëndë sanksionuese ndaj gjigandit kinez të tregtisë elektronike, Temu, duke e gjobitur atë me 200 milionë euro. Sipas ekzekutivit të BE-së, platforma ka dështuar në përmbushjen e detyrimeve të Aktit të Shërbimeve Digjitale (DSA), specifikisht në identifikimin, analizimin dhe vlerësimin e rreziqeve sistemike që lidhen me përhapjen e produkteve të paligjshme dhe të rrezikshme për konsumatorët evropianë.
Produktet e rrezikshme dhe analiza “misterioze”
Vendimi i Komisionit erdhi pas një hetimi të thelluar, i cili përfshiu edhe operacione të blerjeve të fshehta (mystery shopping) nga organizata të pavarura, si dhe të dhëna nga autoritetet doganore. Rezultatet treguan mangësi serioze në sigurinë e artikujve që shiten në platformë. Raporti specifikon se një përqindje e lartë e karikuesve të testuar dështuan në provat bazë të sigurisë, ndërsa lodrat e fëmijëve paraqitnin rreziqe mbytjeje ose përmbanin kimikate mbi normat e lejuara.
Për më tepër, Brukseli zyrtar argumenton se modeli i biznesit të Temu-t, duke përfshirë sistemet algoritmitike të rekomandimit dhe programet e influencuesve, ka ndihmuar në amplifikimin e këtyre rreziqeve. Zyrtarët evropianë theksuan se kompania nënvlerësoi seriozisht shkallën e problemit.
Nënkryetarja e Komisionit Evropian për sovranitetin teknologjik, Henna Virkkunen, u shpreh prerazi mbi rëndësinë e zbatimit të kuadrit ligjor:
“Vlerësimet e rrezikut nuk janë thjesht një ushtrim burokratik, por shtylla kurrizore e DSA-së. Vlerësimi i rrezikut i Temu-së nënvlerëson rreziqet konkrete, i mungon specifikimi, nuk bazohet në prova të forta dhe nuk është gjithëpërfshirës. Ai i lë rregullatorët, përdoruesit dhe publikun në errësirë. Tani është koha që Temu të zbatojë ligjin.”
Masat e sigurisë dhe afati i fundit
Gjoba e vendosur konsiderohet si më e larta e dhënë deri më tani nën ombrellën e Aktit të Shërbimeve Digjitale (DSA), duke kaluar sanksionin prej 120 milionë eurosh të vendosur ndaj platformës X në dhjetor të vitit 2025. Megjithatë, zyrtarët sqaruan se kjo vlerë mbetet dukshëm nën tavanin maksimal prej 6% të xhiros globale të kompanisë mëmë, PDD Holdings, pasi u mor parasysh kohëzgjatja relativisht e shkurtër e shkeljes.
Për të shmangur sanksione të tjera periodike, Temu duhet të reagojë zyrtarisht brenda tre muajve:
28 Gusht 2026 është afati i fundit që Temu të dorëzojë një plan të detajuar masash për korrigjimin e shkeljeve.
Bordi Evropian i Shërbimeve Digjitale do të ketë një muaj kohë për të shqyrtuar planin.
Komisioni Evropian do të marrë vendimin ekzekutues brenda një muaji pas mendimit të Bordit.
Në rast të dështimit për të përmbushur këto kërkesa, platforma rrezikon penalitete të reja financiare të vazhdueshme.
