Edhe pse infertiliteti prek rreth një në gjashtë çifte dhe në afro gjysmën e rasteve lidhet me problemet e fertilitetit tek burrat, ekspertët paralajmërojnë se infertiliteti mashkullor vazhdon të mos marrë vëmendjen e duhur në sistemin shëndetësor.
Shumë burra raportojnë se gjatë procesit të diagnostikimit dhe trajtimit ndihen të përjashtuar, ndërsa fokusi mbetet kryesisht tek partneret e tyre. Sipas specialistëve, kjo mund të vonojë diagnostikimin e problemeve tek burrat, duke e bërë rrugën drejt trajtimit më të gjatë, më të kushtueshme dhe emocionalisht më të vështirë.
Sipas profesorit Allan Pacey, specialist i andrologjisë në Universitetin e Mançesterit, kujdesi për fertilitetin është ndërtuar historikisht rreth grave, ndërsa problemet e burrave shpesh trajtohen si dytësore.
“Kjo nuk do të thotë se duhet të bëjmë më pak për gratë. Përkundrazi, duhet të bëjmë më shumë edhe për burrat. Duke u dhënë atyre një rol të barabartë, mund të ndryshojmë rrënjësisht mënyrën se si trajtohet infertiliteti dhe të përmirësojmë kërkimin shkencor dhe trajtimet”, u shpreh ai.
Edhe profesorja Bola Grace nga University College London theksoi se shumë burra ndihen të përjashtuar gjatë gjithë procesit të diagnostikimit dhe trajtimit.
“Burrat na tregojnë se shpesh nuk dëgjohen. Ata përjashtohen, ndonjëherë pa dashje, nga klinikat, shërbimet shëndetësore dhe madje edhe nga këshillimi psikologjik”, tha ajo.
Luke, një britanik që u përball me infertilitetin, rrëfeu se për më shumë se një vit të gjitha analizat dhe konsultat u përqendruan tek bashkëshortja e tij. Vetëm pas një cikli të pasuksesshëm të fekondimit “in vitro” (IVF), mjekët nisën të hetonin edhe cilësinë e spermës së tij, ku u zbulua një problem që mund të ishte identifikuar shumë më herët.
Ekspertët theksojnë se infertiliteti mashkullor nuk është vetëm çështje riprodhimi, por mund të jetë edhe tregues i problemeve të tjera shëndetësore, si çrregullimet hormonale, obeziteti apo efektet e duhanit dhe alkoolit.
Sipas profesorit Hussain Alnajjar, kirurg urolog dhe ekspert i fertilitetit mashkullor, infertiliteti mashkullor nuk duhet parë vetëm si një problem për të pasur fëmijë.
“Burrat më të shëndetshëm kanë zakonisht edhe shëndet riprodhues më të mirë. Një analizë jonormale e spermës mund të jetë shenja e parë e problemeve të tjera shëndetësore që kërkojnë vlerësim mjekësor. Prandaj infertiliteti mashkullor duhet të konsiderohet një çështje e rëndësishme e shëndetit të burrave dhe një mundësi për ndërhyrje të hershme”, theksoi Alnajjar.
Studimet tregojnë se faktorë si stresi, mungesa e gjumit, pirja e duhanit, konsumimi i alkoolit dhe dieta jo e shëndetshme ndikojnë negativisht në cilësinë e spermës. Megjithatë, mjekët sqarojnë se përmirësimi kërkon ndryshime të qëndrueshme të stilit të jetesës, pasi prodhimi i spermës zgjat rreth tre muaj.
“Prodhimi i spermës zgjat rreth tre muaj. Nëse ndaloni alkoolin të premten në mbrëmje, nuk mund të prisni përmirësim deri të hënën”, pohoi Pacey.
Përveç sfidave mjekësore, shumë burra përballen edhe me paragjykime sociale. Sipas specialistëve, lidhja e fertilitetit me konceptet tradicionale të maskulinitetit bën që shumë prej tyre të hezitojnë të kërkojnë ndihmë ose të flasin hapur për problemin.
Megjithatë, ndërgjegjësimi po rritet gradualisht. Në Britaninë e Madhe, edukimi për fertilitetin mashkullor po përfshihet gjithnjë e më shumë në programet shkollore, ndërsa aktivitetet dhe organizatat mbështetëse po i kushtojnë më shumë rëndësi shëndetit riprodhues të burrave.
Ekspertët kërkojnë që infertiliteti mashkullor të trajtohet me të njëjtën seriozitet si ai femëror, duke theksuar se diagnostikimi i hershëm dhe përfshirja aktive e burrave në proces mund të përmirësojë jo vetëm shanset për të pasur fëmijë, por edhe shëndetin e tyre në përgjithësi.
Artikull i përshtatur nga BBC
