Një hetim i publikuar nga The Times ka rikthyer në qendër të vëmendjes një projekt të diskutueshëm të FIFA-s, i cili, sipas raportimit, mund t’i kishte sjellë presidentit Gianni Infantino përfitime financiare shumë të mëdha.
Bëhet fjalë për një plan që parashikonte shitjen e rreth 20% të të drejtave tregtare të Kupës së Botës përmes kompanisë së FIFA-s, Forward Enterprise. Marrëveshja vlerësohej në rreth 3.65 miliardë euro, por u ndal pas kundërshtimeve të forta nga UEFA, CONCACAF dhe sponsorët kryesorë të organizatës.
Sipas hetimit, Infantino mund të kishte përfituar një paketë kompensimi prej rreth 30 milionë eurosh, duke përfshirë pagën dhe bonuset. Vetë presidenti i FIFA-s ka mohuar se kishte synim të përfitonte personalisht nga projekti.
Shuma e përmendur është rreth dhjetë herë më e lartë se paga e tij aktuale, e cila raportohet të jetë rreth 3 milionë euro në vit.
Plani ishte menduar të miratohej nga 211 federatat anëtare të FIFA-s, të cilave u ishin premtuar gjithashtu përfitime financiare të konsiderueshme. Megjithatë, përballë reagimeve të forta nga drejtues të futbollit ndërkombëtar, projekti u tërhoq dhe nuk u hodh në votim.
Pavarësisht polemikave të ngritura nga raportimi i The Times, Gianni Infantino vazhdon të drejtojë FIFA-n si president i organizatës.
