Irani po diskuton një projektligj të ri për sigurinë në kohë lufte, që synon të forcojë masat kundër asaj që autoritetet e konsiderojnë infiltrimi të huaj.
Nisma ka shkaktuar debate brenda Parlamentit dhe kundërshtime edhe nga qeveria, pasi parashikon kontroll më të madh mbi kontaktet e iranianëve me botën e jashtme.
Projektligji, i njohur si “Projektligji për Infiltrimin”, u hartua pas shqetësimeve për depërtimin e inteligjencës së huaj në Iran.
Ai parashikon që qytetarët të marrin leje paraprake nga Ministria e Inteligjencës dhe Organizata e Inteligjencës së Gardës Revolucionare Islamike për një sërë aktivitetesh.
Në listë përfshihen botimi i librave dhe artikujve, bashkëpunimi akademik, intervistat me media të huaja të konsideruara “armiqësore”, si dhe pjesëmarrja në konferenca shkencore apo aktivitete artistike.
Projektligji parashikon gjithashtu ndëshkime për komunikimet me këto media dhe dërgimin e fotografive, videove apo materialeve të tjera. Shkeljet mund të dënohen me deri në dy vite burg.
Projektligji ka marrë miratimin e përgjithshëm në Parlament në gusht, me 183 vota pro dhe 4 kundër.
Më pas, numri i neneve është rritur nga 19 në 33, ndërsa pjesa më e madhe e dispozitave vijon të jetë në shqyrtim.
Për t’u kthyer në ligj, pas Parlamentit duhet të marrë edhe miratimin e Këshillit të Gardianëve.
Kryetari i Parlamentit, Mohammad Baqer Qalibaf, ka kërkuar ndryshime në disa prej pikave më të rëndësishme.
Ai mbështet masat kundër infiltrimit, por kundërshton një sistem ku qytetarët të kenë nevojë për leje për çdo kontakt me të huajt, duke paralajmëruar se kjo do ta izolonte vendin.
Kundërshtime kanë ardhur edhe nga brenda Parlamentit.
Deputeti Mohammad Mehdi Shahriari e ka cilësuar projektligjin në kundërshtim me interesat kombëtare, ndërsa qeveria e presidentit Masud Pezeshkian ka shprehur shqetësime për ndikimin që ai mund të ketë te akademikët dhe kërkimi shkencor.
Edhe Kombet e Bashkuara kanë kërkuar tërheqjen e projektligjit. Misioni Ndërkombëtar i Pavarur i OKB-së për Gjetjen e Fakteve në Iran ka paralajmëruar se masat mund të kufizojnë më tej liritë themelore dhe të rrisin izolimin e iranianëve nga komuniteti ndërkombëtar.
