Një video dramatike nga Tajvani tregon një burrë që mbahet fort pas një shtylle ndriçimi, ndërsa erërat e fuqishme të tajfunit Champi e ngrenë nga toka. Pamjet, që po qarkullojnë në rrjetet sociale, raportohet se janë regjistruar të premten, më 23 tetor, pranë Universitetit të Kulturës Kineze, në lagjen Shilin të Taipeit.
Në video, burri dëgjohet duke bërtitur, ndërsa përpiqet të mos shkëputet nga shtylla. Në një moment, këmbët i ngrihen nga toka për shkak të forcës së erës. Ende nuk ka informacione për identitetin e tij apo nëse ka pësuar lëndime. Tajfuni ka goditur ishullin me reshje të rrëmbyeshme dhe erëra që, sipas të dhënave të raportuara, kanë arritur deri në 227 kilometra në orë. Pemë të shkulura, çati të dëmtuara dhe ndërprerje të energjisë elektrike janë raportuar në disa zona.
Sipas bilancit të cituar nga Reuters të shtunën, një person ka humbur jetën dhe të paktën 527 të tjerë janë plagosur. Viktima është një burrë që u rrëmbye nga valët në ishullin Liuqiu, në jug të Tajvanit. Mbi 288 mijë familje kanë mbetur pa energji elektrike. Autoritetet kanë mbyllur shkollat dhe shërbimet publike në shumë zona, ndërsa qindra fluturime janë anuluar.
