Në alarmin e sigurisë, ambasada u drejtohet jo vetëm shtetasve amerikanë në Shqipëri, por në të gjithë Evropën
Ambasada e Shteteve të Bashkuara të Amerikës në Tiranë ka dalë me një njoftim urgjent ditën e sotme, për të gjithë shtetasit e saj.
Në alarmin e sigurisë, ambasada u drejtohet jo vetëm shtetasve amerikanë në Shqipëri, por në të gjithë Evropën, të cilëve u këshillohet të qëndrojnë vigjilentë ndaj mjedisit përreth dhe të tregojnë kujdes për sigurinë personale, si dhe të jenë të vetëdijshëm për situatat që mund të paraqesin rrezik.
Shkak për këtë, sipas ambasadës është afrimi i festave dhe shtimi i aktiviteteve që tërheqin turma të mëdha njerëzish.
Po ashtu, shkak për këtë alarm janë bërë dhe protestat që kanë përfshirë një pjesë të madhe të vendeve evropiane dhe sipas njoftimit të ambasadës, gjatë muajve të fundit ato janë shënuar me frekuencë më të lartë.
Në njoftim përmenden edhe kërcënimet e rreme për bomba që kanë shënjestruar aviacionin civil në disa vende evropiane.
Në njoftim theksohet se grumbullimet e mëdha të njerëzve dhe aktivitetet publike mund të përbëjnë objektiva të mundshëm për grupet terroriste dhe kriminelët. Terroristët, përfshirë edhe individë që veprojnë të vetëm, mund të kryejnë sulme me pak ose aspak paralajmërim, duke shënjestruar vende turistike si tregjet, nyjet e transportit, qendrat tregtare, vendet e adhurimit fetar dhe hapësira të tjera publike.
Vlen të theksohet se këto njoftime janë standarde dhe bërë edhe nga ambasadat në vende të tjera të Evropës, mes tyre edhe në Prishtinë.
Njoftimi i plotë:
Alarm sigurie: Ambasada e SHBA-së në Tiranë, 18 nëntor 2026
Vendndodhja: Në të gjithë Evropën
Ngjarja: Me afrimin e sezonit të festave, qytetarët amerikanë këshillohen të qëndrojnë vigjilentë ndaj mjedisit përreth dhe të tregojnë kujdes për sigurinë personale, si dhe të jenë të vetëdijshëm për situatat që mund të paraqesin rrezik.
Grumbullimet e mëdha të njerëzve dhe aktivitetet publike mund të përbëjnë objektiva të mundshëm për grupet terroriste dhe kriminelët. Terroristët, përfshirë edhe individë që veprojnë të vetëm, mund të kryejnë sulme me pak ose aspak paralajmërim, duke shënjestruar vende turistike si tregjet, nyjet e transportit, qendrat tregtare, vendet e adhurimit fetar dhe hapësira të tjera publike.
Qytetarët amerikanë këshillohen të tregojnë kujdes të shtuar gjatë festivaleve dhe aktiviteteve festive, si dhe në vende të tjera ku ka grumbullime të mëdha njerëzish. Vizitorët në zonat turistike të mbipopulluara dhe të frekuentuara duhet t’i kushtojnë vëmendje të veçantë mjedisit përreth dhe të ndjekin gjithmonë udhëzimet e policisë dhe të autoriteteve të emergjencave.
Ndërprerjet e udhëtimeve dhe të jetës së përditshme mbeten të mundshme në të gjithë Evropën gjatë sezonit të festave. Grevat dhe protestat janë shënuar me frekuencë më të lartë gjatë muajve të fundit. Në nëntor, kërcënime të rreme për bomba kanë shënjestruar aviacionin civil në disa vende evropiane, duke shkaktuar ndërprerje të fluturimeve.
Amerikanët këshillohen të ndjekin lajmet lokale gjatë udhëtimeve jashtë vendit për festat, në mënyrë që të informohen mbi ngjarjet ose zhvillimet lokale që mund të shkaktojnë ndërprerje të transportit apo të jetës së përditshme.
Ne i inkurajojmë të gjithë qytetarët amerikanë që ndodhen jashtë vendit të regjistrohen në Programin e Regjistrimit të Udhëtarëve të Mençur (Smart Traveler Enrollment Program – STEP), për të marrë përditësimet më të fundit të sigurisë për destinacionet ku ndodhen.







