Të mërkurën e 19 nëntorit është caktuar që të mbahet seanca e Kuvendit për zgjedhjen e Qeverisë së re të Kosovës. Ajo do të nisë në orën 14:00.

Ndërkaq, në orën 11:00 është thirrur një seancë tjetër me disa pika të rendit të ditës, sikurse janë formimi i komisioneve parlamentare, më pas shqyrtimi i parë i projektligjit për ndarjet buxhetore, miratimi i buxhetit për tri komuna të Kosovës (Prishtinë, Gjilan dhe Zubin Potok), çështja e financimit të Radio Televizionit të Kosovës dhe ratifikimi i disa marrëveshjeve ndërkombëtare.

Reagime për seancën e parë

Deputetja Mimoza Kusari-Lila tha se LVV-ja dorëzoi kërkesën për seancën e parë me nëntë pika të rendit të ditës që përfshijnë disa marrëveshje ndërkombëtare, duke kërkuar mbështetjen e të gjitha partive, pasi argumentoi se ato “nuk i takojnë asnjë partie apo qeverie, ato janë në interes të të gjithë qytetarëve, pa dallim”.

“Për realizimin e kësaj agjende, është i domosdoshëm formimi i katër komisioneve të përhershme parlamentare, të cilat mund të formohen pavarësisht se kush është në pozitë apo opozitë, sepse numri i anëtarëve varet nga pesha e grupit parlamentar në Kuvend, nga gjithsej 11 anëtarë sa duhet të jenë”, shkroi ajo në Facebook.
Pas njoftimit për dy seancat, Lidhja Demokratike e Kosovës tha se nuk do të marrë pjesë në seancën e orës 11:00, duke argumentuar se aty përfshihen marrëveshje ndërkombëtare, kredi, borxhe dhe projektligje buxhetore që kërkojnë proces “serioz e konsultim”.

“LDK nuk merr pjesë në improvizime që shpërfillin rregulloren dhe e reduktojnë agjendën shtetërore në dekor fushate”, tha kjo parti përmes një njoftimi, duke shtuar se do të marrë pjesë vetëm në seancën për Qeverinë e re.

Kjo parti akuzoi LVV-në se po tenton “të përdorë institucionet e Republikës si instrument të lojërave të saj politike”.

“Prej tetë muajsh, vendi mbahet në pasiguri politike nga të njëjtët që sot paraqesin si urgjencë atë që vetë e kanë zvarritur. E njëjta logjikë u pa edhe me zvarritjen 15-ditore të mandatarit pa numra, një proces i humbur që nga fillimi dhe i përdorur vetëm për propagandë”, u tha në njoftim.

Në fund të tetorit, kryeparlamentari Dimal Basha, pas mbledhjes së kryesisë së Kuvendit, kishte deklaruar se nuk kishte gjetur mirëkuptim për formimin e komisioneve parlamentare, me qëllim që të shtyhen përpara si çështja e buxhetit të Kosovës, ajo për RTK-në, por edhe marrëveshjet ndërkombëtare.

Basha e pranoi se pa votimin e Qeverisë së re të Kosovës nuk dihet se kush është në pushtet dhe opozitë dhe për rrjedhojë nuk dihet se sa komisione do t’i takonin partive.
Pas kësaj mbledhjeje, nënkryetarja e Kuvendit të Kosovës nga radhët e Partisë Demokratike të Kosovës, Vlora Çitaku, tha se potentohet të “simulohet demokracia duke shkelur Kushtetutën”.

Seanca për Qeverinë e Kosovës

Seanca për Qeverinë mbahet në ditën e fundit të mandatit kushtetues, pasi presidentja Vjosa Osmani, mandatoi më 4 nëntor Glauk Konjufcën nga Lëvizja Vetëvendosje për formimin e ekzekutivit të ri.

Sipas praktikave, Konjufca pritet të paraqesë një ekspoze para 120 deputetëve dhe të prezantojë kabinetin e ri qeverisës, për votimin e të cilit kërkohen të paktën 61 vota.
Pas propozimit si mandatar nga LVV-ja, Konjufca tha se dëshiron bashkëpunim me partitë parlamentare, por jo edhe ndonjë marrëveshje koalicioni.

Ai tha se kërkon mbështetjen e deputetëve për Qeverinë e tij, në mënyrë që të shmangen zgjedhjet parlamentare në dhjetor dhe që vendi të ketë ekzekutiv “së paku” deri në prill, kur duhet të zgjidhet presidenti i ri i vendit.

Ndërkaq, kreu i LVV-së, Albin Kurti, ka deklaruar se nuk sheh as “mundësi teorike” që të arrihet një koalicion me partitë e tjera shqiptare, të cilat, sipas tij, kanë “ndërtuar një urrejtje hibride ndaj meje”.

Gjatë propozimit të Konjufcës për mandatar, Kurti tha se ai do të marrë postin e zëvendëskryeministrit dhe ministrit të Jashtëm dhe Diasporës – post, që Kurti e kishte propozuar Konjufcën në ekzekutivin e propozuar më 26 tetor. Atëkohë, Kurti dështoi të siguronte 61 votat e nevojshme të deputetëve.

Kurti ishte mandatuar më 11 tetor nga Osmani për të formuar ekzekutivin e ri.
Mandatari i parë për kryeministër, sipas Kushtetutës i takon partisë së parë.
Pas dekretimit të Konjufcës, Osmani tha se partitë e tjera të mëdha shqiptare nuk kishin emër për mandatar, duke shtuar se në Kushtetutë thuhet se nëse ka emër të propozuar për mandatarin e dytë, presidentja duhet ta emërojë atë, e nuk ka hapësirë që të refuzojë emërimin e tij.

LVV-ja i ka fituar zgjedhjet e 9 shkurtit, por nuk ka siguruar ulëse të mjaftueshme në Kuvend që do t’i mundësonin që të formonte Qeverinë pa bashkëpunim me partitë e tjera.

Në zgjedhjet e 9 shkurtit, Partia Demokratike e Kosovës ka fituar 24 ulëse, Lidhja Demokratike e Kosovës 20, Aleanca për Ardhmërinë e Kosovës pesë dhe tre deputetë ka Nisma Socialdemokrate, që në zgjedhje garoi në listë të përbashkët me AAK-në.
Lista Serbe ka nëntë nga dhjetë ulëset e garantuara për minoritetin serb, një e ka partia e Nenad Rashiqit dhe dhjetë ulëse të tjera i kanë fituar përfaqësuesit e minoriteteve të tjera./rel/

Ministri i Punëve të Jashtme të Gjermanisë, Johann Wadephul,tha në Prishtinë se Kosovës i duhet sa më shpejt një qeveri e aftë për të vepruar, sepse votuesit janë duke pritur formimin e saj tash e 8 muaj. Këtë deklaratë, shefi i diplomacisë gjermane e bëri vetëm një ditë para se Parlamenti i Kosovës të provojë në tentimin e dytë që ta krijojë qeverinë e re me mandatarin Glauk Konjufca nga Lëvizja Vetëvendosja.

“Zhvillimi i Kosovës që nga përfundimi i luftës 1999 dhe që nga pavarësia në vitin 2008 është një histori e vërtetë suksesi. Për shumë kënd në rajon, Kosova është simbol i demokracisë dhe i një shoqërie të fortë civile. Në mënyrë që ky sukses të vazhdojë, Kosovës i duhet që sa më shpejt të ketë një qeveri të aftë për veprim si nga brenda ashtu edhe nga jashtë.

Votuesit janë duke pritur formimin e saj që prej tetë muajsh. Ata kanë pritje të arsyeshme që këto procese demokratike të marrin një përfundim pozitiv dhe këtu bën pjesë një qeveri stabile”, tha ministri Wadephul në një konferencë për media pas takimit që zhvilloi me presidenten e Kosovës, Vjosa Osmani.

Angazhim nga të dyja palët për dialogun Kosovë – Serbi

Shefi i diplomacisë gjermane, Johann Wadephul, tha se Gjermania mbështet dialogun për normalizim ndërmjet Kosovës dhe Serbisë të ndërmjetësuar nga Bashkimi Evropian, por kërkoi angazhim nga të dyja palët.

“Ky proces ka ngecur kohëve të fundit. Është shumë e rëndësishme që këtu të ketë përparim konkret. Marrëveshja e Ohrit, e cila i përmban të gjitha elementet relevante për normalizim duhet të zbatohet shpejt dhe plotësisht, këtë e presim ne nga të dyja palët, dhe për këtë nevojitet më shumë angazhim si nga Kosova ashtu edhe nga Serbia.

Për Kosovën kjo nënkupton për shembull hapjen e nevojshme për themelimin e Asociacionit të komunave me shumicë serbe. Është me rëndësi që politika e provokimit të ndërsjelltë dhe të menaxhimit permanent të krizave të marrë fund.Dialogu për normalizim duhet të vazhdojë me vullnetin për mirëkuptim.Ai është kriter i yni i vlerësimit për qeveritë në të dyja vendet”, tha Johann Wadephul. Sipas tij, Gjermania është e bindur se Kosova e ka forcën dhe vullnetin për të zbatuar reformat e nevojshme.

Mbështetje nga Gjermania

“Gjermania është e gatshme që t’iu ndihmojë me gjithë fuqinë që ka në këtë rrugëtim. Mbetet esenciale që gjendja këtu të mbetet e qetë, dhe të mos vijë te konfrontimet siç ka ndodhur më 2023, 2024”, tha kreu i diplomacisë gjermane duke iu referuar zhvillimeve në veri të Kosovës. Ai i vlerësoi lart marrëdhëniet bilaterale ndërmjet Kosovës dhe Gjermanisë, duke theksuar se Gjermania është investitori më i madh në Kosovë dhe partneri më i madh tregtar.

“Në të gjitha temat që i diskutuam sot bëhet fjalë për sigurinë dhe për të ardhmen e kontinentit tonë. Është mirë që Kosova është në anën tonë dhe ne të gjitha vendet, qofshin anëtare të BE-së apo jo, duhet t’ia bëjmë të qartë Rusisë se destabilizimi, dezinformimi dhe manipulimi nuk kanë vend në kontinentin tonë. Përpjekjeve për destabilizim iu përgjigjemi me një Evropë të bashkuar dhe në këtë kuadër, zgjerimi i Evropës është një urgjencë gjeopolitike. Për këtë për herë të parë prej shumë vitesh ka një perspektivë realiste”, tha Wadephul.

Osmani: Thirrje për heqjen e masave të BE-së ndaj Kosovës

Presidentja e Kosovës, Vjosa Osmani, nga ana e saj, kërkoi ndihmën e Gjermanisë për anëtarësimin e Kosovës në Bashkimin Evropian dhe njëkohësisht bëri thirrje për heqjen e masave të BE-së ndaj Kosovës. Kosova është i vetmi vend në rajonin e Ballkanit që ende nuk e ka statusin e vendit kandidat për në BE.

“Vizita juaj në Kosovë është një dëshmi e qasjes suaj dhe qeverisë së udhëhequr nga kancelari Merz, se BE-ja mbetet e paplotë pa anëtarësimin e Ballkanit Perëndimor. Populli i Kosovës e sheh Gjermaninë si aleatin më të besueshëm në gjithë kontinentin evropian. Ne synojmë të hyjmë si kontributdhënës e jo si barrë. Në këtë rrugëtim Kosova ka nevojë për mbështetjen e Gjermanisë. Heqja sa më parë e masave ndaj Kosovës është një urgjencë e domosdoshme për çka shpresojmë në përkrahjen e Gjermanisë”, tha presidentja Osmani. Ajo tha se në këtë kuadër roli i Gjermanisë është vendimtar, duke shtuar se “Kosova është 100 për qind e harmonizuar në politikën e jashtme të BE-së”.

“Ne pajtohemi plotësisht me qasjen e qeverisë së re gjermane që rruga drejt BE-së duhet të bazohet në merita. Kosova është ekonomia më e re evropiane por është dinamike e digjitale. Kosova mbetet e përkushtuar ndaj fqinjësisë së mirë. Përderisa Kosova mbetet nën masa të BE-së as dialogu nuk mund të konsiderohet i barabartë”, tha Osmani./DW