Rusia nisi një valë sulmesh me dronë dhe raketa në të gjithë Ukrainën mbrëmjen e së mërkurës, duke vrarë të paktën 15 persona dhe duke plagosur të paktën 90 të tjerë, thanë zyrtarët ukrainas, citon BBC.
Një djalë 12-vjeçar ishte midis katër viktimave në kryeqytet, dhe tre persona u vranë në Dniepër në juglindje. Matanë kufirit, dy fëmijë, të moshës 5 dhe 14 vjeç, u vranë në një sulm me dron ukrainas në rajonin Krasnodar Krai të Rusisë, tha guvernatori i tij Veniamin Kondratyev në Telegram.
Sulmet vijnë pas një armëpushimi të shkurtër që u arrit gjatë festimeve të Pashkëve Ortodokse në fundjavë, gjatë të cilit të dyja palët akuzuan njëra-tjetrën për qindra shkelje.
Kryebashkiaku i Kievit, Vitali Klitschko, shkroi në Telegram se, përveç vdekjeve në kryeqytet, ekipet e shpëtimit kishin nxjerrë një nënë dhe një fëmijë nga rrënojat e një ndërtese banimi 16-katëshe që u shemb në lagjen qendrore Podilsky të Kievit.
Në veri të kryeqytetit, katër punonjës të urgjencës mjekësore ishin midis të plagosurve si pasojë e bombardimeve të përsëritura.
Në një sulm në qytetin qendror të Dnipros, tre persona u vranë dhe dhjetëra të tjerë u plagosën, shkroi në Telegram Oleksandr Ganzha, kreu i administratës rajonale. Fotot e postuara në internet treguan ndërtesa në flakë në qytet.
Ministri i Jashtëm i Ukrainës, Andrii Sybiha, tha: “Sulme të tilla nuk mund të normalizohen. Këto janë krime lufte që duhet të ndalen dhe autorët e tyre të mbahen përgjegjës.”
Ai u bëri thirrje vendeve të tjera të ndërmarrin veprime të menjëhershme duke lëshuar sanksione kundër Rusisë ose duke ofruar paketa mbështetjeje për Ukrainën.
“Të gjitha vendimet e nevojshme për të rritur presionin mbi agresorin duhet të zhbllokohen tani”, shkroi Sybiha në X të enjten.
